Астанада «Есірткісіз елорда» байқауының жеңімпаздары анықталды. Сайыс мектеп оқушылары мен студенттер арасында өтті. Онда жастар нашақорлықтың алдын алу мен саламатты өмір салтын қалыптастыруға бағытталған авторлық жобаларын ұсынды.
Астанада есірткіге қарсы елордалық жастар бас қосты. Алдын ала іріктелген 50 үміткердің арасынан финалдық кезеңге 6 қатысушы жолдама алған. Олар арнайы жоба аясында нашақорлыққа қарсы интерактивті презентациялар мен креативті идеяларын дайындап, бейнероликтер әзірлеп әкелген. Байқау «Заң мен тәртіп» қағидаты аясында өтіп жатыр.
Әділхан Темірханов, қатысушы:
- «Есірткісіз өмір декадасы» деп аталады. Яғни 1 ай көлемінде әр апта тематикалық апта болып табылады. Бірінші спорт апталығы, екінші апта – профилактикалық апта, үшінші әлеуметтік желілер апталығы және төртінші театралды апта. Мұның барлығы есірткіге қарсы профилактикамен байланысты апталықтар.
Қатысушылардың жобасын қазылар алқасы қадағалап, өз бағаларын берді. Олардың құрамында ұстаздар мен құқық қорғау органдарының өкілдері, қоғамдық ұйым мүшелері бар.
Анара Мұрзабаева, «Астана жастары» ресурстық орталығының бөлім басшысы:
- Нашақорлық елдегі үлкен мәселердің бірі ғой. Біз ұйым болып профилактикалық жұмыстарды істейміз. Мысалы, мектептердің базасында психологтармен, заң өкілдерінің қатысуымен тренингтер өткіземіз. Қазіргі жастардың идеясы ғой. Подкасттар өткіземіз. Яғни профилактикалық тұрғыда қолымыздан келген жұмысты істейміз.
Астанада жыл басынан бері есерткіге байланысты 1200-ден астам құқық бұзушылық тіркелген. Сәйкесінше заңсыз айналымнан 500 келіге жуық есірткі заттары тәркіленді. Ұйымдастырушылардың да басты мақсаты осы – жастар арасындағы нашақорлықтың алдын алу.
Әлия Қибатқызы, Астана қаласы ПД Есірткі қылмысына қарсы іс-қимыл басқармасының бөлім бастығы:
- Аталған іс-шара есірткі бизнесіне қарсы бағытталған кешенді жоспар, сондай-ақ «Астана – есірткісіз қала» жоспары аясында өткізіліп жатыр. Бұл байқаудың басты мақсаттарының бірі – жастардың нашақорлыққа қарсы күресті өз көзқарастарымен қалай көретінін білу. Соны тамашаладық.
Ұйымдастырушылар алдағы уақытта үздік жоба авторларын қолдап, есірткіге қарсы күресті күшейте бермек.
Авторлары: Мерей Қанапия, Абдулхамит Бөлекбаев
