Тараз қаласында бос жұмыс орындары жәрмеңкесі ұйымдастырылды. Шараға қаладағы 30-ға жуық ірі, орта және шағын кәсіпорын өкілдері қатысып, тұрғындарға түрлі бағыттағы жұмыс орындарын ұсынды.
Ұйымдастырушылардың мәліметінше, жәрмеңкеде құрылыс, медицина, білім беру саласы, ауыр өнеркәсіп, сондай-ақ әскери қызметке қатысты бос орындар ұсынылды. Жұмыс іздеген 300-ден аса тұрғын келіп, жұмыс берушілермен тікелей жүздесіп, ұсынылған вакансиялар туралы ақпарат алды. Іс-шара «Жұмысшы мамандықтар жылы» аясында Тараз қаласы әкімдігі мен прокуратура мамандарының ұйымдастыруымен өтті. Сонымен қатар келушілерге «Заң мен Тәртіп» тұжырымдамасы шеңберінде құқықтық кеңес берілді.
Нариман Торабеков, облыс прокурорының аға көмекшісі:
- Бұл іс-шараның негізгі мақсаты – жұмыс берушілерге ынталы қызметкерлер табуға, сондай-ақәлеуметтік тұрақтылықты нығайтуға, сонымен қатар жұмысшы мамандықтар жылының аясында дәріптеу болып табылады. Жалпы өңірдегі қылмысты төмендетуге құқық бұзушылықтардың алдын алуға сондай-ақ мемлекет басшысы жариялаған «Заң мен тәртіп» қағидатын іске асыру болып табылады.
