Ақтауда «Dosti Skills» атауымен халықаралық салалық білім чемпионаты өтіп жатыр.

Байқау "Жұмысшы мамандықтар жылы" аясында ұйымдастырылған. Оған еліміздің аймақтары мен шет елдерден келген 40 студент қатысуда. Қазақстанның намысын ақпараттық технологияны жетік меңгерген, сондай-ақ өңірлік «WorldSkills Kazakhstan» сайысында топ жарған жастар қорғайды.

Халықаралық чемпионат өтіп жатқан ғимарат сырт көзге кәсіпорын іспеттес. Қызу жұмыс үстіндегі жастарға, әртүрлі қондырғыларға қарап бұл жерді өндіріс орнына ұқсаттық. Ұйымдастырушылардың да көздегені осы екен. Байқауға қатысушылар арнайы алаңға кірген соң әр құрама топқа тапсырма беріледі.

Қазақстандық команда мүшесі Әділет Қожахмет 7-сыныптан бастап робототехникамен шұғылданған. Қазір ол Көкшетау колледжінде оқиды. Байқауда өздері құрастырған шағын роботтың жоғары баға аларына сенеді.

Әділет Қожахмет, чемпионатқа қатысушы /Көкшетау/:

- Бүгін байқаудың екінші күні. Алғашқы тәулікті біз қосалқы бөлшектерден робот құрастырдық. Ендігі тапсырма: робот бұрылысы көп жолдардан тоқтамай жүріп өтуі керек. Бұдан соң қарсы алдындағы кедергілердің пішінін, түсін дәл анықтауға тиіс. Ол үшін оған арнайы датчиктерді орнатамыз. Расында да, бұл жерде мен өзімді нағыз инженер ретінде сезінемін.

Валерия Ходырева, чемпионатқа қатысушы /Мәскеу/:

- Өз басым чемпионатты халықтарды бірлікке, бауырластыққа шақыратын шара ретінде қабылдадым. Ақтау қаласына алғаш келуім, осында жаңа достар таптым. Байқаудан алған тәжірибеміз кәсіби маман ретінде қалыптасуымызға оң ықпал етері сөзсіз.

Білім додасы үшін спорт кешенінде арнайы алаңдар дайындалған. Қатысушылар «Электроника, «Роботехника» және «Протиптеу және модельдеу» құзыреттілігі бойынша өз біліктілігін көрсетуде. Студенттерден құралған командалар байқауда Австралия, Қытай, Сауд Арабиясы, Ресей және Қазақстанның намысын қорғайды. Әр топтың жұмысын халықаралық дәрежедегі сарапшылар саралайды.

Жәния Сармурзина, облыстық білім басқармасының бөлім басшысы:

- «WorldSkills» әлемдік чемпионаты Шанхай қаласында өтеді 2026 жылы, Қытай Халық республикасында. Соның бас сарапшысы келіп қатысып отыр. Бұл үлкен жарыс, оның үстіне бізге тәжірибе алаңы болып отыр. Осы чемпионаттың аясында студенттеріміздің өздері дайындаған ІТ бағытындағы, ақпараттандыру және басқару бағытындағы өнімдерін біз көрмеге қойдық. Бұл көрме алаңы — қазіргі таңда кәсіби бағдар беру алаңы болып тұр.

Білімпаз жастар көрмеге әзірлеген ІТ жобалармен 2 мыңнан астам оқушы танысқан. Бұл өскелең ұрпақтың заман талабына сай мамандықтарды таңдауына түрткі болары анық, дейді мамандар. Айта кетсек, жаһандық чемпионат аясында қазақстандық және Сауд Арабиясы колледжі арасында ынтымақтастық жөніндегі меморандумға қол қойылды. Құжат үздік студенттердің шетелдік оқу орнында тәжірибе алмасуын көздейді.

Талғат Исламұлы, Ренат Досалиев