Бүгін Көкшетауда Қазақстан рекорды тіркелді, деп хабарлайды 24KZ. Халықаралық балаларды қорғау күніне орай 1 тонна 700 келі балмұздақ дайындалып, балғындарға тегін таратылды. Сондай-ақ қалада жаңа жағалау ашылды. Демалыс орнында скейтпарк пен түрлі ойын алаңдары бар.
Бұқпа тауының етегі. Қопа көлінің жағасы. Жаңа жағалау дәл осы жерде орналасқан. Керемет көріністі көзбен көрген қала тұрғындары да таңдасын жасырмады.
Абай Ахтанов, қала тұрғыны:
- Көкшетауда бұрын-соңды мұндай болмаған. Балаларға өте қолайлы. Қыдыруға, кешкісін судың қасында серуендеуге жақсы. Бірнеше ойын-сауық орындары ашылған. Өте керемет енді.
Бибісара Қаржасова, қала тұрғыны:
- Иә, бүгінгі көңіл күй керемет. Жаңа жағалаудың ашылғанына өте қатты қуаныштымыз. Бұл жерде балалар үшін өте көп нәрсе жасалыпты. Ойын-сауық алаңдары бар. Бәрі таза, бәрі әдемі.
Жаңа жағалау жеке инвестиция есебінен салынды. Бұған 2 миллиардтан астам теңге бөлінді.
Марат Ахметжанов, облыс әкімі:
- Бұл жағалаудың бір ерекшелігі, бюджеттен бір тиын қаржы шыққан жоқ. Бұл үлкен кәсіпорындардың әлеуметтік жауапкершілігінің арқасында жасалып отырған жоба. Өйткені Президент қойып отырған талап, тапсырма – халықтың тұрмысын жақсарту, көңілін көтеретін жағдай жасау.
Мерекеге орай балғындарға тегін балмұздақ таратылды. Арнайы ойын-сауық бағдарламасы ұсынылды. Оның ішінде спорттық бәсекелер, балалардың дамуына арналған ойындар ұйымдастырылған.
Аружан Қайдар, колледж студенті:
- Бұл мари монтессори ойыны. Балалардың сенсорикасын дамытуға арналған. Балаларға қызық болып келеді. Сипап сезу арқылы, көру арқылы жан-жақты дамиды.
Ал жаңа жағалаудың оң жақ бөлігінде ауыл шаруашылығы өнімдерінің жәрмеңкесі өтті. Оған жергілікті кәсіпорындармен қатар Тәжікстан Республикасы мен Түркістан облысынан келген тауар өндірушілер қатысты. 332 тоннадан азық-түлік өнімі саудаланды. Баға нарықтағыдан 15-20% төмен болды.
Ермұхаммед Құралбеков, Түркістан облыстық Ауыл шаруашылығы басқармасы басшысының орынбасары:
- Жәрмеңкеге 200 тоннадан астам бақша, көкөніс, жеміс-жидек, балық және қайта өңдеу өнімдерін Көкшетау қаласының тұрғындарына нарықтағыдан 15-20% төмен бағада ұсынып отырмыз. Жәрмеңкеміз жақсы, мына халықтың ойынан, халықтың көңілінен шығып, жоғары деңгейде өтіп жатыр.
Сонымен қатар велошеру ұйымдастырылды. Оған кәсіби спортшылармен қоса қарапайым тұрғындар да қатысты. Салтанатты шарада аймақтың дамуына сүбелі үлес қосып жүрген белсенді балалар мен жастар марапатталды.
Авторлары: Абзал Азаматұлы, Евгений Шинкаренко, Виктор Полянный
