Жетісу облысындағы колледж студенттері туристерге арналған қосымша ойлап тапты.

Білімгерлер өздерінің ақпараттық жүйесін енді көпшілік қолданатындай деңгейге жеткізбек.

Әли Наматов пен Дастан Кәкімжан Жетісудың көрікті жерлеріне жол көрсететін ақпараттық жүйені сынақтан өткізе бастады. Сол арқылы қанатқақты жобаның кем-кетігін анықтап, жетілдіруге күш салып жатыр.

Әли Наматов, студент:

- Қазақстанға жаңа келген туристерге жол көрсетіп, мейрамханалар, қонақүйлерді қажетті жерлерді көрсетуге арналған. Ең ерекшелігі бір қаладан екінші қалаға қозғалуға тиімді болады. Қосымша қалған бағдарламалар сияқты жәй ғана істемейді. Оның қандай елден жазғанына байланысты тілі ауысып отырады. Сондықтан ол жаңадан келген туристерге оңай болады.

2023 жылы Сарқан ауданындағы колледжде «Туризм менеджері» деген мамандық ашылды. Бұл саланы таңдаған студенттер алғашқы медициналық көмек көрсетуді үйренеді. Сонымен қатар құзға өрмелеуді, таулы аймақта велосипед тебуді, жабайы табиғатта өмір сүруді де меңгереді.

Мұхтар Кәрімов Сарқан көпсалалы колледжінің директоры:

- Паркінің ұжымы бар тікелей келісім шарт жасап, ынтымақтастық орнатып сол жақтан ұстаздар келіп тәжірбиесімен арнайы пән сабақтарын сол кісілер жүргізеді. Әмбе сол кісілердің базасында тәжірие аламыз.

Білім ордасында ағылшын тілі, еңбек пәнінің және бастауыш сыныптың мұғалімдері де дайындалады. Шет тілін меңгергендер «Жоңғар Алатауы» паркіне келген туристерге жол көрсетсе, қолөнер шеберлері ұлттық бұйымдарымызды жасап, салт-дәстүрімізді дәріптейді.

Ернұр Өмірзақ, студент:

- Осы мамандыққа мен мектеп кезінен сурет және қолөнерді жақсы көргендіктен осы мамандықты таңдап отырмын. Осы мамандықты таңдаған себебім өзіме қатты ұнайды. Келешекте мен осы оқудың жоғарғы оқуға түсем деп отырмын және жеке кәсіп ашсам деп отырмын.

Дархан Әмірхан, оқытушы:

- Әр адамда өзінің бір зат жасауға сурет салуға сүйіспеншілік болады. біздің мақсат сол сүйіспеншілікті ашу, ынтасын ашу, бағыт-бағдарын беру, қолдарынан қалай дүние жасау керек екенін ұғындыру.

Былтыр Жетісу облысындағы 20 мемлекеттік колледжде нарықтағы сұранысқа ие 13 мамандық ашылды. Оқу орнын аяқтаған түлектерді жұмыспен қамту үшін 60-тан аса кәсіпорымен келісімшарт жасалды.

Шыңғыс Қалиден, Қуаныш Түргенбаев