Мемлекет басшысы Біріккен Ұлттар Ұйымы Бас Ассамблеясының орнықты даму мақсаттарына орай Халықаралық еріктілер жылын жариялауға арналған сессия қатысушыларына үндеу жолдады.
Қасым-Жомарт Тоқаев өз сөзінде "Еріктілер қозғалысы Орнықты даму мақсаттарына жету жолындағы азаматтық белсенділік пен прогреске ықпал ететін ізгі амалдың жасампаздық қуатына айналарына кәміл сенеміз",- деді.
Сондай-ақ қазіргідей алмағайып заманда еріктілер адам өмірін сақтау, қиындыққа душар болған жандарға жәрдемдесу, қоғамдағы сенім мен ынтымақты нығайту арқылы аса маңызды миссия атқарып келетіндігіне ерекше тоқталды. Бұдан бөлек Алматы қаласын халықаралық ынтымақтастық хабына айналдыруды құптайтынын жеткізді. Орталық Азия мен Ауғанстанға арналған Орнықты даму мақсаттары жөніндегі БҰҰ Өңірлік орталығының құрылуы осындай мүмкіндікке жол ашты, деді қазақ басшысы.
