Шығыс Қазақстан облысында 27 елді мекенге интернет желісі тартылып жатыр, деп хабарлайды 24KZ. Биыл шалғайдағы 47 ауыл алғаш рет сапалы интернетпен қамтылады. Тау бөктеріндегі елді мекендерге үздіксіз байланыс сигналын беру үшін биік мұнаралар орнатылып жатыр. Бұл жұмыстар 2027 жылға дейін жалғасады.
Ұзақ жылдар байланыс аясынан тыс жерде болған Весёлый ауылы қазір расымен көтеріңкі көңіл күйде. Себебі сапалы интернет жетті. Енді тұрғындар «24KZ» арнасын қарап, жаңалықтардан хабардар бола алады.
Еркежан Дегенбаева, Тархан ауылдық округінің әкімі:
- Өте қуаныштымыз. ХХІ ғасыр болған соң бізге интернет керек. Жаңалық, елімізде не болып жатқанын көру керек, Сондықтан рақмет.
Ауылдың байырғы тұрғыны Ержан Мұсабаев енді байланысқа шығу үшін тау-тасты араламайды. Елді мекендерге тартылған интернеттің жылдамдығы секундына 50 мегабиттен асады.
Ержан Мұсабаев, Весёлый ауылының тұрғыны:
- Интернетсіз бұрын қиын болды. Бір жерге шығу керек, іздеу керек, ұстау керек. Қазір оп-оңай, жақсы болып тұр.
Дегенмен өңірде интернетке қосылмаған әлі 93 ауыл бар. Олар Катонқарағай, Күршім және Марқакөл аудандарында орналасқан. 2027 жылға дейін 66-сы интернетке қол жеткізеді.
Индирa Серікханқызы, Цифрландыру және архив басқармасының бөлім басшысы:
- Біз «Қолжетімді интернет» ұлттық жобасын жүзеге асырып жатырмыз. Мемлекеттік мекемелерді талшықты оптикаға қосамыз, ал үйлерге интернет тарату жүйесі орнатылады. Сонымен қатар мобильді топтар интернет сапасын тексереді.
Ал Өскеменде ел бойынша тұңғыш ақпараттық-аналитикалық орталық ашылады. Бұл жүйе онлайн-карта арқылы интернет жылдамдығын тіркеп отырады.
Авторлары: Рүстем Қайратұлы, Вячеслав Ветлугин, Дмитрий Пыхтин
