Биыл Таразда 5 мектеп күрделі жөндеуден өтіп, тағы 3 білім ошағына жапсарлас ғимарат салынып жатыр.
Оған қоса жақында Келешек мектебі пайдалануға беріледі. Осылайша қала мектептеріндегі орын тапшылығы толық жойылды. Жаңғыртудан өткен мектептер мен құрылыс алаңдарын аймақтағы әріптесім көріп келді.
Тараздағы №1 гимназиясына 50 жылдан бері күрделі жөндеу жасалмаған. Сыныптары тозып, жиһаздары ескірген. Республикалық қазынадан 700 миллионнан астам теңге бөлініп, ғимарат жаңартылды.
Жансая Ерсейітова, қала тұрғыны:
- Мектептің деңгейі өте жоғары білім сапасы жағынан. Оған лайықты ремонт жасалып, бала-шағамыз өте жақсы мектепте білім алып жатыр. Қауіпсіздік жағынан да біздің балаларымызға өте ыңғайлы деп ойлаймын. Бейнебақылау барлық кабинеттен бөлек ауласында да бар.
№7 мектеп-гимназияда да құрылыс қарқынды. Мұнда 300 орынға шақталған жапсарлас ғимарат қолданысқа беріледі. Осындай нысан тағы екі мектепте салынып жатыр. Одан бөлек, 3 мектепте күрделі жөндеу аяқталып, тағы екеуі жаңғыртылуда.
Раушан Қожамжарова, қалалық білім бөлімінің басшысы:
- Осы күрделі жөндеу жұмыстары жүргізілген барлық мектептерге, реновациялық мектептер деп аталады олар. Скл 401 млн тг қаражат бөлініп, Скл осы заманауи қазіргі щаманға сай материалдық техникалық базамен қамтылды.
Ал Шөлдала шағын ауданында келесі айда Келешек мектебі ашылады. Білім ошағы 55-орта мектептегі 570 баланың орын тапшылығын шешпек. Жалпы бұған дейін облыс орталығында 3 келешек мектебі пайдалануға берілді.
Азамат Нұртанов, №70 орта мектеп директоры:
- Stem лабораториясы, робототехника, барлығы бар. Биология жаңадан жабдықталған, химия кабинеттері. Одан кейін әр кабинеттерде интерактивті тақталар берілген. Әр мұғалімге жеке-жеке компьютермен керек құрал жабдықтармен толық қамтылған.
Қаладағы мектептердің материалдық-техникалық базасы нығайтылуда. Биыл республикалық бюджеттен 801 млн теңге бөлініп, барлық мектепке модификациялық кабинет алынып, жиһаздары жаңартылды.
Мерей Бает, Бақытжан Бапаев
