Елордада Ұлттық мектеп лигасының волейболдан ақтық кезеңі өтті. Финалда Түркістан және Қостанай өңірлерінен келген командалар бас жүлдені сарапқа салды. 7-8-сынып оқушылары арасында өткен сайыстың қорытындысы бойынша Түркістан облысының құрамы 2:0 есебімен жеңіске жетті. Ал күміс жүлде қостанайлық спортшыларға бұйырды. Ақтөбе облысының волейболшылары үшінші орынға табан тіреді.
Жарыста елдің әр өңірінен келген 18 команда бақ сынады. Шара соңында жеңімпаздар мен жүлдегерлер кубок, медаль, дипломдармен марапатталды. Айта кеткен жөн, Ұлттық мектеп лигасы 10 спорт түрін қамтиды. Олардың қатарында мектеп бағдарламасына енген футбол, шахмат, тоғызқұмалақ, жеңіл атлетика, үстел теннисі, баскетбол, асық ату, гандбол сынды ойындар да бар.
Дияра Нишантаева, Түркістан облысының қатысушысы:
- Сонша қиналсақ та, бірінші орын алып келе жатырмыз. Қазір республикалық деңгейде ойнап жатырмыз. Білеміз, ол қиын. Сонда да сонша команданы жеңіп, енді жеңіліп қалу ұят болса керек.
Мақсат Әбенов, Ұлттық мектеп лигасының волейбол бойынша бас төрешісі:
- Бұл жарыстың ерекшелігі, басынан бастап санаған кезде 3,5 млн-нан астам бала қатысып жатыр. Бұл республикамызда ең үлкен сан болып есептеледі. Ауылдан бастап аудан, сосын облыс және республикалыққа дейін келеді. Бұл жерде ауылдың командалары Астанада финалға дейін жетіп жатыр.
