Қазақтың қара домбырасы Қытай қорғанында да күмбірледі.
Халық күйі орындалып, төл өнеріміз бен ұлттық аспап көпшілікке таныстырылды. Қазақ-қытай балалары қатар отырып, домбыра шертіп қалың туристі тәнті етті.
Руслан Бақытбекұлы, тілші:
- Мына алып тас қабырға мыңжылдықтар бойы үнсіз тұрған тарих. Бүгін осы үнсіздікті қазақтың қара домбырасы бұзды. Балалар қос ішекті аспапта ойнап домбыра күніне үн қосты. Ал күмбірлеген күйді осында жүрген мыңдаған саяхатшы естіді.
Мұндай іс-шара Қытай қорғанында алғаш рет болып отыр. Қазақтың қасиетті домбырасы қытайдың қастерлі қамалының биігіне көтерілді. Ұзындығы 20 мың шақырымнан асатын атақты қорғанның үстінде күй ойнады. Халық күйі «Келіншекті» қазақ-қытай балалары қатар отырып орындап, құттықтау жолдады.
Қазақтың домбырасы Қытайда насихатталып жатыр
Домбыра ішкі Қытайда да танылып келеді. Оны қытай балалары арасындағы қызығушылықтың артуынан байқауға болады. Осы жолы да домбыраға әуес қытайлық бүлдіршіндер мерекелік акцияға қатысуға ниет білдірген. Мына Люй Цзысинь деген жеткіншек төл өнерімізді 6 жасында үйренген. Қазаққа еш қатысы жоқ қытай баланың бүгінде домбырасы қолынан түспейді. Қазір бірнеше күйді еркін тарта алады.
Люй Цзысинь, өнерпаз:
- Домбыра шертіп үйреніп жүргеніме 4 жылдай болды. Маған бұл аспап қатты ұнайды. Бастапқыда шеберлердің күй тартқанын интернеттен көріп қызықтым. Ата-анам қолдап Қазақстаннан тапсырыспен домбыра алып берді. Оның үні таза әрі құлаққа жағымды. Әсіресе шертпе мен жұмсақ дыбысы өте әдемі естіледі.
Руслан Бақытбекұлы, тілші:
- Қазір менің жанымда Лан и Чжоу және Хуа Лин И деген қытайдың қызы мен ұлы отыр. Екеуінің де жасы 5 жаста. Олар домбыраны 1,5 жылдың ішінде үйреніп алған. Дәл бүгінгі домбыра күні қазақ балаларымен бірге олар күй орындап ат салысуға келген екен. Қазір бізге келіншек күйін орындап береді.
Тарихи іс-шараны Қазақстанның Қытайдағы елшілігі Домбыра күніне арнайы ұйымдастырды. Дәл осы жерде өткізудің өз мәні мен мақсаты бар.
Қаламқас Серікқызы, ҚР Қытайдағы Төтенше және өкілетті Елшісінің кеңесшісі:
- Бұл мәдениет саласындағы дипломатияның маңызды бөлігі болып саналады. Екіншіден бұл іс-шараның өткізілу себебі біздің ұлттық аспаптарымызды, мәдениетімізді осы қытай халқына жеткізу. Оларды да біздің аспаптарымызбен ойнауға шақыру болып табылады.
Нағыз қазақ – қазақ емес, нағыз қазақ – домбыра
Түсірілім кезіндегі бір қызық. Жанымызға «аға» деп келген мына қара бала қытайдың қазағы боп шықты. Бейжіңге Шыңжаңдағы Баркөл ауылынан келіп білім алып жүрген студент. Домбыра үнін естіп жақын тартып келіпті.
Ердана Адақұлы, Бейжің қаласының тұрғыны:
- Осы мына түсіп келе жатқан кезде тамаша көріністі көрген кезде домбыраға деген, қазақ қаным деген ойнап, керемет сезім келіп өзім іздегім келіп, кезіккім келіп. Нағыз қазақ қазақ емес, нағыз қазақ домбыра дейді. Домбыра бар жерде қазақ болады. Барлық адам ұқсақ қой. Бірақ домбыраны көргенде қазақ екенін тани аласың ғой..
Ұлы Қытай қорғанын көруге күніне 80 мыңға дейін саяхатшы келеді. Күйдің арқасында осыншама қаптаған қалың туристің ішінде қазақты қазақ таныды. Домбыра құдіретінің бір көрінісі осы болса керек...
Руслан Бақытбекұлы, Мадияр Ерсайын
