Көне Жанкент қалашығындағы археологиялық қазба жұмыстары кезінде IX ғасырдағы оғыздардың күміс теңгелері мен тұрмыстық бұйымдары табылды.
Ғалымдар қалашық тарихы V ғасырға дейін тереңдеуі мүмкін деген болжам айтты. Қазба жұмыстары Түркі академиясы мен Қорқыт ата университетінің бірлескен жобасы аясында жүргізіліп жатыр. Аумақ қоршалып, археологиялық стела орнатылды. Табылған шырағдан, саптыаяқ, дастархан сынды бұйымдар ежелгі оғыз мемлекетінің өзіндік өркениеті болғанын айғақтайды. Бұйымдардың бетінде бедерленген таңбалар — тайпа немесе шебердің мөрі болуы ықтимал, дейді археологтар. Ғалымдар бұл нысанды тек археологиялық ескерткіш емес, бүкіл түркі дүниесінің рухани тамыры деп бағалап отыр. Жалпы Жанкенттің тарихы әлі де терең зерттеуді қажет етеді.
Шаһин Мұстафаев, Түркі академиясының президенті:
- Жанкент қаласы IX-X ғасырларда Сырдария бойындағы Оғыз мемлекетінің астанасы болған. Бұл қала тек Қазақстан тарихында емес, бүкіл түркі халықтарының ортақ тарихында маңызды орын алады. Табылған жәдігерлер — керамика, қола тіпті 7-ғасырдан қалған ағаш бұйымдар қаланың ежелгі ірі орталық болғанын дәлелдейді.
