Тәртіп сақшылары күдіктіні көп ұзамай ұстап, көлігін айып тұрағына қойды.
Түркістан облысы Сарыағаш қаласында көлігімен Жаңа жылдық шыршаны құлатып кеткен жүргізуші ұсталды, деп хабарлады 31 арнаның Информбюро ақпараттық бағдарламасы.
Көпшіліктің қызу талқысына түскен оқиға бейнебақылау камерасына жазылып қалып, жария болған еді. Орталық алаңдағы жасанды желекті аударып кеткен азамат шығынды толық өтейтін болады. Осылайша, әкімдік орнатқан мерекенің басты символы бір-ақ сәтте бүлінді.
Түнгі үште "Ваз" маркалы машинасымен алаңды шыр айналған жүргізуші сырғанап барып шыршаға соғылған. Соның салдарынан биіктігі алты метрден асатын алып желек төңкеріліп қалған. Екі жолақты кесіп, жол ережесін өрескел бұзған жергілікті тұрғын оқиға орнынан із суытқан. Бірақ тәртіп сақшылары күдіктіні көп ұзамай ұстап, көлігін айып тұрағына қойды.
"Анықталғандай, орталық алаңда орнатылған "Жаңа жыл – 2026" мерекелік бас шыршасын "ВАЗ 2105" маркалы автокөлік жүргізушісі шыршаны айналмақ болып, көлікті басқара алмай соққан. Жас жүргізуші шыршаны қалпына келтіріп, алдағы уақытта мұндай құқық бұзушылыққа жол бермейтінін айтты", – деді Түркістан облысы полиция департаменті әкімшілік полиция басқармасының бастығы Ерлан Асқаров.
