Марқұмның отбасы ұлының бензин иісіне уланып өлгеніне сенбейді.
Маңғыстау облысындағы Үстірт шекара қызметінде борышын өтеп жүрген 20 жастағы Еркебұлан Сағындық көз жұмды. Әскери бөлім басшылары оның жанармай иісіне уланып қайтыс болғанын айтқан. Алайда, қара жамылған отбасы бұл сөзге сенбейді, деп хабарлады 31 арна.
Марқұмның туыстары Еркебұланның соңғы кезде қатты қиналып жүргенін айтып, жиі ақша сұрағанын алға тартады. Оның әскерден оралуына бар болғаны бес ай қалған еді.
"Сенбі күні сөйлескенде, ол басқа бөлімге ауысуға мүмкіндік бар ма екенін сұрады. "Таныс жоқ па?" деді. "Тыныштық па 5 ай қалғанда?" деп жауап бердім. Дені сау, спортпен айналысатын бала. Бензиннен уланды деп жатыр. Ол қалай уланады? Түсінбеймін", – деді марқұмның анасы Гүлназ Жұмабаева.
Еркебұлан Сағындық қалыңдығына жазған хатында Маңғыстаудағы әскери бөлімге келгеніне өкінетінін және мұнда сарбаздарға мүлдем жағдай жасалмағанын айтқан. Бойжеткеннің телефонында оның 15-20 мың теңге көлемінде жиі ақша сұраған хаттары да әлі сақтаулы.
Еркебұланның досы Ақниет Мұқан оған бұзылған қозғалтқышты жөндетуге де қаражат аударғанын айтты.
"Қорқытты ма, білмеймін. "Моторды істеуіміз керек" деп ақша сұраған жазбасы менде әлі сақтаулы тұр. Менен 10-15 мың, 20 мыңдап ақша сұрайтын және қиналып кеткенін көп айта беретін", – деді Ақниет Мұқан.
Ал Ұлттық қауіпсіздік комитетінің өкілдері қылмыстық іс қозғалып, тергеу басталғаны туралы қысқа ғана ақпарат таратты.
"Алдын ала мәлімет бойынша, қасіреттің себебі – техникалық жұмыстар кезінде қауіпсіздік шараларын сақтамауы болып табылады. Полиция органдары қылмыстық іс қозғады, қосымша қызметтік тергеу жүргізілуде", – делінген ҰҚК Шекара қызметінің жауабында.
