Марқұм осыдан үш жыл бұрын Украинадағы қақтығыстан қашып, Америкаға отбасымен бірге келген екен.
АҚШ-та украиналық босқынды өлтірген қаскөй өлім жазасына кесілуі мүмкін, деп хабарлады 31 арнаның Информбюро ақпараттық бағдарламасы.
Ең ауыр үкімді тағайындауды Дональд Трамптың өзі талап етіп отыр.
Еске салайық, қанды қылмыс өткен айда Солтүстік Каролина штатында болды. Украиналық Ирина Заруцкая жұмысынан шығып, үйіне қайту үшін пойызға кіреді. Қыздың артында отырған афроамерикандық азамат бір сәтте қалтасынан пышақ шығарып, еш себепсіз Иринаның мойнына үш рет сұғып алады. Қаскөй өзі де жарақат алып, қансырағанына қарамастан қоғамдық пойыз тоқтаған бойда қаша жөнеледі.
Ал көп қан жоғалтқан нәзік жанды сол жерде жан тапсырыпты. Марқұм осыдан үш жыл бұрын Украинадағы қақтығыстан қашып, Америкаға отбасымен бірге келген екен.
Босқынға шабуыл жасаған — 34 жастағы Декарлос Браун. Шизофрения дертімен ауыратын ол бұған дейін 14 рет сотталған екен. Оның ішінде ұрлық, тіпті қарулы тонау да бар. Соңғы қылмысы үшін бес жыл түрмеде отырған.
"Украинадан бейбіт өмір мен қауіпсіздік іздеп келген бойжеткенді айуандықпен өлтірген адам міндетті түрде сот алдында жауап беруі керек. Әрі, бұл тез арада жүзеге асуға тиіс. Және оған тағайындалатын жалғыз ғана әділ жаза бар – өлім бойғы жаза. Басқа жол жоқ!", – деді АҚШ президенті Дональд Трамп.
