Павлодарда «INNOVATION» республикалық хакатоны басталды. Жұмысшы мамандықтар жылы аясында ұйымдастырылған ауқымды шараға еліміздің әр өңірінен келген командалар қатысып жатыр. Колледж студенттері мен түлектері, сондай-ақ ерекше білімді қажет ететін жандар өзара тәжірибе алмасып жатыр. Осылайша олар стартап жобалар бойынша серіктестер тауып, кәсіби IT-қауымдастыққа интеграциялануға мүмкіндік алады. Жеңімпаз командаға Павлодар облысының әкімдігі 3 миллион 500 мың теңге көлемінде жүлде табыс етеді.
Павлодар өңірінде республикалық хакатон екінші рет ұйымдастырылды. Биылғы байқау жұмысшы мамандықтар тақырыбына арналды. Бұл салаға IT мамандары да кіреді. Қазақстанның әр өңірінен жиналған жас бағдарламашылар әсіресе киберқауіпсіздік пен жұмысшы мамандығының мәртебесін көтеруге бағытталған тың әрі тиімді жобаларды ұсынып отыр.
Мирас Қайратұлы, Алматы политехникалық колледжінің студенті:
- Біздің командада әртүрлі мамандық иелері бар. Біз әртүрлі мақсатта әртүрлі тапсырмаларға жауап береміз. Мысалы, бір бала «код» жасаса, бір бала қауіпсіздігіне жауап береді дегендей. Ал бір бала дизаинын жасайды.
Командалар берілген техникалық тапсырмаға сәйкес толық цифрлық өнімнің прототипін әзірлеуі тиіс. Сараптамалық кеңес жобаларды 10 түрлі критерий бойынша бағалайды. Бағалау критерийлерінің қатарына инновация, функционалдық, дизайн, сондай-ақ әлеуметтік және практикалық жобалар кіреді.
Елнар Өтебаев, облыстық Білім беру басқармасының Ақпараттық технологиялар орталығының басшысы:
- Павлодар облысының әкімдігі осы хакатонға 3,5 миллион теңге жүлделік қор бөлді. Жалпы біздің хакатонымызға еліміздің түкпір-түкпірінен 17 облыс пен қаладан 27 команда келді. Болашақта IT саласы жастар үшін өте маңызды.
Жас бағдарламашылардың шеберлігін eGov сияқты ірі мемлекеттік порталдарды жетілдірген кәсіби білікті мамандар бағалайды. «INNOVATION» хакатоны бұл жарыс қана емес, тың идеяларды жүзеге асырып, алғашқы стартап жобаларды бастауға мүмкіндік береді.
Авторлары: Қарлығаш Қасиетова, Марат Игіліков, Дәулет Қошқарбаев
