Абай облысында «Dala SK Construction» ЖШС мен оған қатысы бар бірнеше компанияның басшылығы үлестік құрылыс ретінде заңсыз ақша жинады деген күдікке ілінді, деп хабарлайды Egemen.kz.
Қаржы мониторингі агентігінің мәліметінше, компаниялар екі жыл бойы тұрғын үй кешендерін қажетті рұқсат құжаттарынсыз, жобалық-сметалық құжаттамасыз, мемлекеттік сараптама мен авторлық қадағалаусыз салған. Соған қарамастан, интернет ресурстарында пәтерлерді төмен бағамен және пайызсыз бөліп төлеу мүмкіндігімен жарнамалап отырған.
Уәде етілген алты көпқабатты үйдің орнына «Irtysh Riverside» кешенінен тек бір ғимараттың қаңқасы ғана көтерілген. Бұған дейін компания заңсыз құрылыс, рұқсатсыз кәсіпкерлікпен айналысу және нысан салу фактілері бойынша үш бірдей әкімшілік баппен жауапқа тартылып, құрылысты тоқтату туралы шешім шығарылған.
Алайда соған қарамастан, компания басшылығы әрекетін жалғастырып, жаңа сатып алушыларды тартқан.
«Нәтижесінде 64 азаматпен жалған брондау шарттары жасалған. Заңсыз тартылған қаражаттың жалпы сомасы 1 млрд теңгеден асты. Түскен қаражат Өскемен қаласындағы басқа да байланысы бар компаниялардың шоттарына аударылып, онда да заңсыз құрылыс жұмыстары жүргізілген», делінген хабарламада.
Келтірілген шығынды өтеу мақсатында күдіктілердің мүлкіне шектеу қойылды – 2 пәтер, 10 жер телімі, 6 автокөлік. Іс ұйымдастырушысының өзі қамауға алынған.
