Абай облысында биыл 11 өрт сөндіру бекеті ашылды.
Төтенше жағдайда жедел әрекет ету үшін 20-дан астам арнайы техника сатып алынды. Жаңа бекеттер шалғай елдімекендерде орналасқан. Ондағы мақсат өрт сөндіру және құтқару шараларын тиімді жүргізу.
Бұл көліктер төтенше жағдай кезінде өте қолайлы. Оның басты артықшылығы маневрлігінде. Яғни кез келген жерде жүре алады. Техника соңғы үлгідегі маңызды өрт сөндіру құралдарымен жабдықталған. Олар өрт сөндірушілерге суды қызыл жалынға тікелей қол жеткізіп, одан әрі таралуын болдырмайды.
Мейір Бажан ТЖ қызметінде 10 жылдан астам уақыт еңбек етеді. Қазір Семейде ашылған өрт сөндіру бөлімінің бастығы қызметінде. Жаңа нысан заманға сай қажетті құралдармен жабдықталған. Бөлімшеде жұмыс істейтін 21 өрт сөндірушіге қолайлы жағдай жасалған.
Мейір Бажан, Өрт сөндіру бөлімінің бастығы:
- Осы жаңа бөлімге 4 техника берілді. Олардың барлығы жаңадан берілген. Осы 2025 жылғы техникалар барлығы, оларды енді жұмыста қолданып отырмыз. Әр күн әрқалай болады. Бір күні жұмысымыз тыныш болса, бір күні әртүрлі әртүрлі жағдайлар авариялық құтқару жұмыстары, өрт сөндіру жұмыстары секілді қызметтермен сәйкес болады.
Өңірдегі жер үйлерде 304 өрт оқиғасы тіркелген. Бұл өткен жылдың осы кезеңімен салыстырғанда 44 пайызға көп. Осыған байланысты жауаптылар өрттің алдын алу шараларын күшейтіп, материалдық-техникалық базаны жаңартып жатыр. Апта сайын арнайы рейдке шығады.
Әлібек Тұрсынханов, облыстық ТЖД Өрт сөндіруді ұйымдастыру және авариялық-құтқару жұмыстары басқармасы басшысының м. а:
- Келіп жатқан жаңа техника шынымен заман талабына сай. Жол талғамайды, цистернасының көлемі үлкен, қуаты мықты. Сондай-ақ өрт-техникалық жабдықтары да әмбебап әрі заманауи. Бұған қоса, жыл соңына дейін тағы 4 өрт сөндіру көлігін аламыз.
Биыл Жаңасемей, Мақаншы секілді шалғайда жатқан 11 ауылда өрт сөндіру пункті ашылды. Жыл соңына дейін тағы 7 ауылда өрт сөндіру бекеті қолданысқа беріледі. Облыста мыңнан астам құтқарушы жұмыс істейді.
Авторлары: Рүстем Қайратұлы, Медет Өмірханов
