Елімізде экономикалық әлеуеті артып жатқан аймақтар бестігін Солтүстік Қазақстан түйіндейді. Жыл басынан бері мұндағы өнеркәсіп саласы 19,1 пайызға өскен. Инвестиция көрсеткіші 7,3%-ға артты. Ірі инвестициялық жобаларға Қатар, Ресей елінің қаржысы тартылды.
Кейінгі екі жылда өндіріс 1,5 есе артқан. Экономиканың 86 пайызын қайта өңдеу саласы қамтиды. Қазір жаңа нысандар салынып жатыр. Қолданыстағы кәсіпорындар жаңғыртылуда.
Ғауез Нұрмұхамбетов, Солтүстік Қазақстан облысының әкімі:
- Мәселен, «ЗИКСТО» ЖШС жолаушылар вагоны мен платформа вагондарды шығаратын өндірісті іске қосты. Инвестиция көлемі 24 млрд теңгеден асады. Кәсіпорын жылына 3200 бірлік шығаруға қауқарлы.
Аймақта 51 инвестициялық жоба пулы жасақталып, жүзеге асып жатыр. Оның жалпы құны 894 млрд теңге. Нәтижесінде 8 мыңға жуық жұмыс орны құрылады.
Ғауез Нұрмұхамбетов, Солтүстік Қазақстан облысының әкімі:
- Өңірге тікелей инвестиция тарту жоспары қарқынды жүзеге асып жатыр. Бұл ретте «Қызылжар» арнайы экономикалық аймағының маңызы зор. Мұнда 22 қатысушы тіркелген еді. Инвестицияның жалпы көлемі 317 млрд теңгеден асады. Қазірдің өзінде бес жоба іске қосылды. Енді 17-сін қатарға қоспақпыз. Инвестиция сомасы 280,2 млрд теңге. Үш мыңнан аса жұмыс орны құрылады. Бұл жобаларға Түркия, Италия, Қытай, Германия, Қатар, Ресей және Қазақстанның инвесторлары қатысып жатыр.
Бұдан бөлек, ағаш өңдеу мен жиһаз класстерін дамыту жолға қойылды. Бұл жобаға Қатар инвесторлары қаржы құяды. Ал ресейлік компания кондитерлік өнімдер өндірісін қолдауға ниет білдірген.
Авторы: Мерей Мұратханқызы
