2026 жылы қазақ-қытай арасында бірлескен инвест жобалар саны артады. Бұған екі тарап та мүдделі.
Көрші елдің инвесторларына Қазақстан тарапынан мемлекеттік қолдау жалғасады. Осы арқылы біздің елге мейлінше инвестиция көлемін арттыру көзделіп отыр. Сонымен қатар сауда айналымына да ерекше мән беріледі.
Қытайлық компаниялардың Қазақстанның бизнес климатына деген сенімі артты. Әлемде инвестицияға талас жүріп жатқан кезеңде Қазақстан батыл әрі нақты шешімдер қабылдады. Осының арқасында дүниежүзіндегі екінші экономика саналатын Қытаймен тығыз байланыс орнап, тиімді жобалар жүзеге асып жатыр.
Қазір Қазақстанда қытайлардың қатысуымен жұмыс істейтін компаниялардың саны 7 мыңға жуықтады. Бұл жөнінде төтенше және өкілетті елші Шахрат Нұрышев Қазақстанның Қытайдағы достары клубының 8-ші отырысы кезінде айтты. Екіжақты сауда-саттықтың да көлемі өсті. Биылғы жылдың 10 айының өзінде 40 млрд долларға жуық сауда жасалған. Бұл өткен жылдың осы кезеңімен салыстырғанда 8,9 пайызға көп. Енді 2026 жылы қазақ-қытай арасында бірлескен инвестжобалар саны артады. Бұл бағытта екі елде үкіметаралық диалог орнаған. 2005 жылдан бері Қытайдан тартылған инвестиция көлемі 27 млрд АҚШ доллардан асты. Қазақстан аумағында жалпы құны 96 млрд доллар болатын 238 жоба жүзеге асырылып жатыр.
Шахрат Нұрышев, Қазақстан Республикасының Қытайдағы Төтенше және өкілетті елшісі:
- Тараптар инвестицияларды өзара қорғап, оған қолдау көрсету туралы жаңартылған келісімге қол қойды. Бұл инвесторлардың мүдделерін қорғауға негіз болады. Онда халықаралық стандарттар ескерілген. Бұл іскер топтардың сенімін нығайтады.
Айта кету керек, өткен жылы екі елдің сауда-саттығы 44 млрд АҚШ долларын құрап, бұрын-соңды болмаған көрсеткішке жетті. Қытайлық сарапшылардың пікірінше биыл сауда айналымы тағы да рекорд алдында тұр.
Авторлары: Руслан Бақытбекұлы, Мадияр Ерсайын
