Шерзат Полаттың өліміне байланысты қылмыстық іс бойынша сот отырысы жалғасуда.
Үзілістен кейін Қылмыстық-процестік кодекстің 87-бабы 11-бөлігіне сәйкес, судьяға жарияланған қарсылықты судья Асқар Бейімбетов қарады, деп жазады inbusiness.kz сайты.
Сот барысында қорғаушы Жұмат Әбенов тергеуші мен сарапшыларды сотқа шақыруды сұрап, басты айыпталушы Абзал Шынасылға қатысты кейбір айғақтардың бір-біріне сәйкес келмейтінін атап өтті.
"Іс құжаттарында Абзалдың үстінде қара түсті киім болғаны жазылған, бірақ шын мәнінде оның киімі қара-көк болған. Бұл маңызды айырмашылық, сондықтан тергеуші мен сарапшылардың жауабын тыңдау қажет" - деді адвокат.
Алайда судья қорғаушының төрағалық етуші судья Ержан Жанұзақовқа жариялаған қарсылығын негізсіз деп тауып, өтінішті қанағаттандырмады.
Прокурор сотта айыпталушыларға тағылған баптарды нақтылап өтті:
- Абзал Шынасыл — ҚР ҚК 293-бабы 3-бөлігі (бұзақылық), 99-бап 2-бөлігі 1, 4, 7, 9, 14-тармақтары (адам өлтіру), 24-бап 3-бөлігі (қылмысқа дайындалу және оқталу);
- Равиль Сәкиев — ҚР ҚК 293-бабы 3-бөлігі, 24-бап 3-бөлігі, 99-бап 2-бөлігі 7, 9-тармақтары;
- Шыңғыс Белғожаев, Нұрқияс Ілиясов, Дархан Әскентай, Нұрбол Тоқтаубаев, Дидар Қалиахмет, Азамат Тоқтаубаев — ҚР ҚК 293-бабы 3-бөлігі бойынша (бұзақылық);
- Кәмелетке толмаған Дидар Ысқақ — ҚР ҚК 434-бабы (қылмыс туралы хабарламау).
