Оқиға 29 қазаннан 30-ына қараған түні Астана әуежайында болған.
Scat авиакомпаниясын "Астана – Ақтау" бағыты бойынша рейстің кешіккенін растады, деп хабарлайды inbusiness.kz сайты.
Жағдайдың бұлай өрбуінің басты себебі – жолаушының деструктивті мінез көрсетуі.
Жолаушылардың сөзінше, жанжал ұшаққа отырғызу уақытында басталған. Олар ұшуды бір сағаттан аса уақыт күтуге мәжбүр болған.
"Біз түн ортасында ұшуымыз керек еді. Өте суық, тіпіт әжетханаға да жібермеді" деп мәлім етті оқиға куәгері.
Scat әуе компаниясының баспасөз қызметі рейстің кешігу себебін түсіндірді.
– Жағдай толық реттелгенге дейін ұшаққа отырғызу уақытша тоқтатылды. Ұшу қауіпсіздігін және қоғамдық тәртіпті қамтамасыз етуге бағытталған ішкі рәсімдерге сәйкес барлық қажетті шара қабылданды, – делінген әуе компаниясы таратқан хабарламада.
Көлік полициясы басқармасы инцидент ер адамның экипаждың заңды талабын орындамағанын, жолаушылар отырғызылғаннан соң өз бетімен ұшақ салонын тастап кетуінен болғанын нақтылай түсті.
Аталған іс-әрекет – авиациялық қауіпсіздік ережелерін бұзу.
Әуе компаниясы өкілдерінің актісі негізінде азамат полиция қызметкерлеріне тапсырылған. Оған Әкімшілік құқық бұзушылық туралы кодекстің 566-бабы бойынша ("Әуе кемесіндегі тәртіп ережелерін бұзу") әкімшілік хаттама толтырылды.
