Qazaq Air (Vietjet Qazaqstan) әуе компаниясы өз бағыттар желісін кеңейтіп, Орталық Азияның маңызды қалалары – Бішкек пен Самарқандқа тікелей рейстерді ашатынын хабарлады.
Енді Қазақстан астанасы бұл өңірлік орталықтармен тұрақты әуе қатынасына ие болады.
Компанияның бұл бастамасы Президент Қасым-Жомарт Тоқаевтың түркі елдері арасындағы байланыстарды дамыту арқылы туризмді, сауданы, білім беру мен мәдени әріптестікті нығайту жөніндегі стратегиялық бағытымен үйлеседі.
Астана – Самарқанд – Астана – 2025 жылдың 7 қарашасынан бастап, аптасына екі рет (жұма, жексенбі);
Астана – Бішкек – Астана – 2025 жылдың 10 қарашасынан бастап, аптасына екі рет (дүйсенбі, бейсенбі).
Qazaq Air (Vietjet Qazaqstan) басқарма төрағасы Әділбек Өмірәлиев жаңа бағыттардың аймақтық ынтымақтастықты дамытудағы маңызын атап өтті:
«Астана, Самарқанд және Бішкек арасындағы тікелей әуе қатынасы жолаушыларға ыңғайлы сапар ұсынып, іскерлік, туристік және мәдени байланыстарды кеңейтеді. Бұл бағыттар саяхатшыларға, кәсіпкерлерге және студенттерге жаңа мүмкіндіктер ашады».
Астана әуежайындағы хаб арқылы әуе компаниясы жолаушыларға Бішкекке, Самарқандқа, Омбы мен Новосібірге, сондай-ақ Қазақстанның өңірлеріне тиімді түйісу рейстерін ұсынады.
