Бұл туралы Қазақстан Премьер-министрінің орынбасары – Сыртқы істер министрі Мұрат Нұртілеу хабарлады.
2026 жылдан бастап Алматы мен Жапония астанасы Токио арасында тікелей әуе қатынасы жолға қойылады, деп жазады inbusiness.kz сайты.
Оның айтуынша, Астанаға алғаш ресми сапармен келген Жапония Сыртқы істер министрі Такеши Иваямен өткен кездесуде көлік, логистика, энергетика және жоғары технологиялар саласындағы ынтымақтастық мәселелері талқыланған.
– Көлік және логистикаға ерекше көңіл бөлінді. Жапония тарапы "Орта дәліз" аясында Ақтау портындағы кедендік қызметті цифрландыруға қолдау көрсетпек. Келесі жылдан бастап "Алматы – Токио" тікелей әуе рейсі іске қосылады. Сонымен қатар, атом энергетикасы, ядролық отын өндірісі, ядролық медицина салаларындағы серіктестікке де үлкен мүмкіндіктер бар, – деді Мұрат Нұртілеу.
Министр Қазақстанның сирек және маңызды элементтерге бай екенін, олардың "жасыл" технологиялар үшін маңызы зор екенін атап өтті.
– Жапонияға қажет 32 шикізаттың 22-сі Қазақстанда өндіріледі. Осы бағытта "Тау-Кен Самұрық" пен Жапонияның "JOGMEC" корпорациясы арасында бірлескен инвестициялық жобаларды жүзеге асыруға келісімге келдік, – деді ол.
