Алматылықтар даңқты қолбасшы, Халық қаһарманы Бауыржан Момышұлына тағзым етті.
28 гвардияшы-панфиловшылар саябағындағы батырдың ескерткішіне гүл шоғы қойылды. Рухына құран бағыштап, қайсарлық пен парасаттың үлгісіне айналған тұлғаны бір минут үнсіздікпен еске алды. Іс-шараға батырдың келіні, жазушы, қоғам қайраткері Зейнеп Ахметова қатысып, қазақ еліне алғысын айтты. Биыл Бауыржан Момышұлының туғанына 115 жыл толды. Оның соғыс жылдарындағы жүрек жұтқан ерлігі мен қолбасшылық қағидаттары бүгінге дейін жас сарбаздарға үлгі. Халық қаһарманының әскери шеберлігі мен өнегелі сөздері әлі де өзекті.
Зейнеп Ахметова, Бауыржан Момышұлының келіні:
- Атам марқұм баяғыда «мен өлген соң да тірілердің ішінде жүремін» дейтін. Сонда жас кезім ғой, онша түсінбеппін. Қазір қарап тұрсам, шынында да мінеки мынау атаның келіп жатқан атағы бүкіл Қазақстан қуанып жатыр. Бүкіл ел-жұрт риза болып, тойлап жатыр.
Аягүл Миразова, Қазақстанның Еңбек Ері:
- Ол кісінің тек әскери ғана мынау өнегесі қалған жоқ. Ол кісінің мынау тәрбиедегі өнегесі, ұлттық құндылықтарға берген бағасы ол – ерекше. Мынау Бауыржан Момышұлының әрбір айтқан сөзі, әрбір өнегесін мектептің бағдарламасына енгізуді қолға алса екен, деп мен ұстаз ретінде сұрар едім.
