Тұрсын Алакөзовтің жомарттығын жазбаған адам кемде-кем. Кәсіпкер қарамағында ұзақ жыл жұмыс істеп келе жатқан жұмысшыларын жинап, бір-бір үйдің кілтін ұстатқан. Сөйтіп, ұжым арасында 100 пәтерді үлестіріп берді. Ашық дереккөздердегі ақпаратқа сүйенсек, оған Баян ханымның өмірлік жары 3 млрд теңгесін қия салған. Мәрттік деп осыны айт, деп жазып жатыр сарапшылар мен түрлі БАҚ көздер.

Осы ретте Қаржылық сауат арнасы көпшілікті расымен де мазалайтын сұраққа сарапшылардың пікірін жинақтады, деп хабарлайды Caravan.kz медиа порталы.

«Зона комфорта»

Қазір заман өзгерді дейді мамандар. Қоғамда, жалпы жержүзінде қозғалыс көп. Тыным таппаймыз. Осы бір жанталас көбіміздің санамызды сілкіп жіберді. Құндылықтар өзгеріп жатыр. Басқа басқа, бір орында тапжылмай жұмыс істейтін адамға «сен «зона комфортада» жүрсің, отырып қалмау керек, өзіңді қамшыла» деп ақыл айта бастайды. Тіпті, бір жерде 5-7 жыл жұмыс істесек, «қой, орын ауыстыру керек» деп қипақтай бастаймыз. Сонда, бір орында тапжылмай еңбек ету ұят болғаны ма?

Артықшылығы мен кемшілігі

Әрине, бұл екіұшты көзқарасқа ие тақырып. Бір орында тапжылмау — ұят немесе тұрақтылық деп кесіп айту қиын. Дегенмен, салыстырмалы түрде кемшілігінен артықшылығы басым екені анық.

Біріншісінен бастасақ, бір ортаға ғана бейімделіп қалатын адам заман талап ететін жаңа дағдыларды меңгере алмауы мүмкін. Сосын еңбек нарығында «икемсіз екен», «өзгеріске дайын емес» деген көзқарас қалыптастырады.

Ал, енді тұрақтылықтың артық тұстарын саралап көрсек, ең алдымен ұжымда сенімге ие боласың, белгілі бір деңгейде бедел қалыптаса бастайды. Бір саланы ұзақ жыл терең меңгерген кадр кәсіби маманға айналып шыға келеді. Қызметте өсуге мүмкіндік артады. Ең ақыры, зейнетке шыққанша сол мекеменің «соцпакет» бойынша игілігін көріп, тұрақты бонустарың жинақ боп жинала береді.

Жаңа орта стресс тудыруы мүмкін

Жұмыс орнын жиі ауыстыратын да адамдар бар. Тіпті, көп болуы мүмкін. Оның да «плюс-минусын» жоққа шығара алмаймыз.

Артықшылығын теріп көрсек, ұдайы өзгеріп тұратын жаңа ұжым, жаңа сала — жан-жақты болуға, әр қырыңды ашуға, дамуға жақсы. Әртүрлі ортаға бейімделіп, әріптестердің тілін тауып, коммуникацияңды дамытасың. Қысқасы, жан-жақты маманға айналасың. Жұмысты жиі ауыстыру арқылы жақсы жалақыға кенелуің мүмкін.

Енді, әрине, бұның кемшін тұстары да менмұндалап тұр. «Көшіп-қонып» жүрген маманға аз уақытта бедел жинау қиын. Ол — бір. Екіншіден, көп адам жұмыс орнын жиі ауыстырып, жаңа ортаға бейімделе алмай жүреді. Ол да белгілі бір деңгейде — стресс.

Сосын жұмысты «қолғапша» ауыстыратын адамдар HR-мамандардың «сүзгісінен» өтпей қалуы мүмкін. Олар сіздің «жүріске» қарап, сенімсіз, тұрақсыз адам деп қабылдауы ғажап емес. Осындай қарапайым факторлар табысы жақсы компанияға апарар жолды кесіп жатса, көңілге сызат түсіреді.

Ойымызды түйсек: Мәселе — ұятта да, тұрақтылықта да емес — әр адамның өз алдына қойған мақсатында, таңдаған жолында тұр.

Егер өзіңіз еңбек ететін мекемеде өсуге мүмкіндік бар болса, «соцпакеті» өзіңізге сай келсе, ортасы жақсы болса, бір орында ұзақ отырғанның еш айыбы жоқ.

Егер жалақы төмен, өзіңіз де, жұмыс орныңыз да дамымаса, тұрмысыңызды түзей алмаса, өсуге мүмкіндік шектеулі екеніне көз жетсе, басқа жұмыс іздеген дұрыс.

«Кешегі кәсіпкердің жомарттығы, әрине, көп адамға (жұмыс берушіге) ой салса, игі. Маманның қадірін біліп, адал еңбегін бағалай алса, екі жақ та ұтылмасы анық. Бұл оқиғаны — «тұрақтылық жемісі» деп бәріңізді бір жерде тапжылмай жұмыс істеуге үндей алмаймын, әрине. Оның үстіне, елдің бәрін бірдей жарылқап жатқан ешкім жоқ. Бірақ, Тұрсын ағайдан да ауқатты кісілер/компаниялар жетіп артылады. Қатардағы жұмысшысының бәріне бірдей үй әпермесе де, айлық жалақысын реттеп, жеңілдігін қарастырып беріп отырса да көңілге медеу ғой. Ең бастысы, кім (қай мекеме) болса да кадрдың қадірін білсе болды. Ал, жұмыста тұрақтылықты ұнатасыз ба, әлде ұдайы қозғалыста жүргенді қалайсыз ба — оны өзіңіз шешесіз. Сүретін өміріңіз де, істейтін жұмысыңыз да — меншігіңіздегі дүние. Өзіңіз қожайын, өзіңіз би», — деп түйіндеді Қаржылық сауат арнасы.