Қазір ол қамауда отыр.
Ыстанбұл қаласының бұрынғы мэрі, оппозиционер Экрем Имамоғлы 143 қылмыс бойынша айыпталып отыр, деп хабарлайды inbusiness.kz сайты.
Hürriyet газетінің жазуынша, прокурорлар соттан бұрынғы шенеунікке 828 жылдан 2352 жылға дейін бас бостандығынан айыру жазасын сұрамақ.
"Тергеу аяқталды. Айыптау қорытындысы 3900 беттен тұрады. Онда Экрем Имамоғлы мүддесіне жұмыс істеген қылмыстық топқа қатысы бар 402 күдіктінің аты аталған. Имамоғлы олардың басшысы болған. 105 күдікті қазірдің өзінде қамауға алынды. Барлығы 143 қылмыстық эпизод бар, соның ішінде 12 пара алу, 7 қаржы жымқыру және 7 алаяқтық дерегі тіркелген. Бас прокуратура Имамоғлыға жалпы 828 жылдан 2352 жылға дейін түрме жазасын сұрайды", – деді Түркияның бас прокуроры Акын Гюрлек.
Айыптау қорытындысына сәйкес, Имамоғлы басқарды делінген топтың әрекетінен мемлекеттік мекемелерге шамамен 3,8 млрд доллар залал келтірілген.
Экрем Имамоғлы 2019 жылдан бері Ыстанбұл мэрі қызметін атқарған. 2024 жылы бұл лауазымға қайта сайланған. 23 наурыздан бері ол жемқорлық қылмыс жасады деп айыпталып, Силиври түрмесінде қамауда отыр.
Айта кету керек, 19 наурыз күні жемқорлыққа қарсы операцияда Ыстанбұл мэрі Экрем Имамоғлыны қамауға алу туралы шешім қабылданғанын жазғанбыз.
