Олар жыл сайын киіктердің 20 пайызын ет, аңшылық және фармацевтика бағытында пайдалануды ұсынды.
Мәжілістің Аграрлық мәселелер комитетінің отырысында Жәңгір хан атындағы Батыс Қазақстан аграрлық-техникалық университетінің ғылым жөніндегі проректоры, биология ғылымдарының докторы Әлжан Шәмшидин киіктерді пайдалану бойынша ғалымдардың ұсынысын таныстырды.
Олардың есебінше, жыл сайын киіктердің 20 пайыз бөлігін пайдалану олардың санын реттеуге ғана емес, ел бюджетін толтырып, экономиканы дамытуға да септігін тигізеді. Киіктерді тірідей және сойып етін сату, мүйіздерін фармацевтика бағытында пайдалану және аңшылыққа рұқсат ету арқылы Қазақстан жалпы көлемі жылына 20 миллиард долларға дейін пайда көре алады. Оның ішінде:
- Киік етін және ет өнімдерін сату – 2,5 миллиард доллар;
- Ішек-шабағын іске асыру – 1 миллиард доллар;
- Аңшылық жобалар – 500 миллион доллар;
- Тірідей сату – 15 миллиард доллар;
- Фармацевтика – 500 миллион доллар.
"Бұл ретте жабайы киіктерді күзгі уақытта арнайы қоршауға қамап, алдымен текелерін өндіріске жіберуді ұсынамыз. Ұрғашы киіктерді көктем және жаз айларында да игеруге болады. Киік еті мен дериваттарын терең қайта өңдеу арқылы табысты мол өнім алуға болады. Қазіргі таңда біздің ғалымдар киік етінен жасалатын түрлі шұжық өнімдерін зерттеу негізінде әзірлеп жатыр. Егер бұл жобаға мемлекет деңгейінде рұқсат берілсе, біз Тағамтану институтымен бірге кәсіпорындарға шұжық жасау технологияларын бөлісуге дайынбыз", – деді Әлжан Шәмшидин.
Оқи отырыңыз: Көктемде 800 мың басқа жуық киік өлексесін жинау қаупі бар – ғалымдар
