Маңғыстау облысында полиция қызметкерлері киіктеің тұтас еттері мен мүйіздерін тәркіледі , деп хабарлайды Egemen.kz.
Бейнеу ауданының Тұрыш ауылындағы үйлердің бірінің ауласында полиция мен «Бүркіт» арнайы жасағының бірлескен жедел-іздестіру іс-шаралары барысында киік еттері мен мүйіздерінің заңсыз сақталғаны анықталды.
Тінту кезінде Қызыл кітапқа енген тоғыз киіктің еті, 30 мүйізі, 16 миллиметрлік калибрлі оқ-дәрілер және өзге де заттай айғақтар табылып, тәркіленді.
Оқиға бойынша сотқа дейінгі тергеудің бірыңғай тізіліміне қылмыстық іс тіркелді. Тәркіленген заттар сараптамаға жіберілді. Күдіктіге қатысты бұлтартпау шарасы ретінде елден шықпау туралы қолхат алынды.
Айта кетейік, заң бұзушыны әшкерелеу бойынша операция Маңғыстау облысы прокуратурасының үйлестіруімен жүргізілді.
