UFC жанкүйерлері үшін мұхиттың арғы жағынан жағымды хабар келіп жетті.
АҚШ-тың танымал комментаторы Джон Аник өзінің подкастында қазақстандық Шавкат Рахмонов (19-0) пен бұрынғы UFC жартылай орта салмақ чемпионы Белал Мұхаммад (24-4) арасындағы жекпе-жек қазан айында өтетінін хабарлады.
Бұл жекпе-жек UFC-дің жартылай орта салмақтағы титулдық жарысына әсер етуі мүмкін. Шавкат Рахмонов 100% көрсеткішімен дивизиондағы ең қауіпті қарсыластардың бірі болып саналады. Ол желтоқсан айында ирландиялық Иэн Гэрриді (16-1) төрешілердің бірауыздан шешімімен жеңіп, жарақатынан кейін қазіргі таңда қалпына келуде.
Белал Мұхаммад жақында UFC 315 турнирінде аустралиялық Джек Делла Маддаленаға (18-2) қарсы титулдық жекпе-жекте жеңіліп, чемпиондық белбеуден айырылды.
Қазіргі уақытта UFC бұл жекпе-жекті ресми түрде жарияламағанымен, Джон Аниктің мәлімдемесі мен екі спортшының жағдайы бұл кездесудің өтетінін меңзеп тұрғандай.
Шавкат Рахмонов үшін алдағы жекпе-жек оның чемпиондыққа үміткер ретінде позициясын нығайтуға мүмкіндік берсе, ал Белал Мұхаммад үшін бұл жеңілістен кейінгі қайта чемпиондыққа оралу мүмкіндігі болмақ.
