Туыстарының айтуынша, ол шотына шамамен 1 миллион теңге жинап қалаға ұлының оқуы мен пәтерін төлеуге келіпті.
Ұлының оқуын төлеймін деп барып Қарағандыда ақшасы тоналып адам қолынан өлген 40 жастағы Нұргелді Наукеновтің жақындары әділдік сұрайды, деп хабарлады 31 арнаның Информбюро ақпараттық бағдарламасы.
Олардың айтуынша, құзырлы органдар іске қатысы бар алты адамның тек біреуін ғана соттаған. Одан бөлек, марқұм ауыр жарақат алғаннан кейін жедел жәрдем шақырудың орнына оны үш сағат бөлімшеде ұстаған полицейлер де жазасыз қалды дейді.
Шағымданушылар болған жайтты қасақана ұйымдастырылған қылмыс деп санайды. Жұмбақ жағдайда мерт болған 40 жастағы Нұргелді Наукенов Қарағандыға қыркүйектің 4-і барған.
Туыстарының айтуынша, ол шотына шамамен 1 миллион теңге жинап қалаға ұлының оқуы мен пәтерін төлеуге келіпті. Содан қаладағы танысымен үй жалдап, кешқұрым автовокзал маңындағы дәмханаға барған. Кешкі аста оларға тағы бірнеше кісі қосылады. Кейін сол топтағы адамның бірі Нұргелдіні итеріп, ол жерге қарақұспен құлап есін жоғалтқан.
"Оң жақ аяғынан шалып, менің бауырымды бар күшімен итереді. Сосын итергендері бар, полиция қызметкерлері бар барлығы оны сүйреп, автовокзалдың екінші жағына алып кетеді. Бұлар бауырымнан құтылғанша асығады. Таксиға салып жібереді", – деді марқұмның әпкесі Айгүл Наукенова.
Сөзге сенсек, ессіз жатқан Нұргелдіні таксиге бірге отырған танысы жалдаған пәтерінің алдына тастап кеткен. Кейін ол аяққа тұрып үйін іздепті. Сол сәтте көршілері шағымданып, полиция шақырып марқұмды басқа полицейлер бөлімшеге апарған.
Жақындарының айтуынша, тәртіп сақшылары жарақат алған адамды үш сағат ұстап, медициналық көмек бермеген. Кейін 16 жастағы ұлын шақырып, ілестіріп жіберіпті.
"Баласын танымай тұрса да баласының қолынан ұстатып жібереді. Ол баласы студенттермен пәтер жалдап тұрғандықтан әкесіне гостиница жалдайды. Тек қана "Мен жатайыншы" деп айта берген соң, сол қонақ үйге жатқызып кетеді. Сол жерде бауырым, оның фото мен видеосы да бар, қиналып қайтыс болған", – деді марқұмның әпкесі Айгүл Наукенова.
