Бұл халықтың жаппай қаржы ұйымдарына қарызға батуына әкелді дейді экономистер.
Елімізде доллардың қымбаттағанына қарамастан халық белсенді түрде несие алып жатыр, деп хабарлады 31 арнаның Информбюро ақпараттық бағдарламасы.
Ұлттық банктің мәліметінше, қазақстандықтардың қаржы ұйымдарына қарызы 39 триллион теңгеге жуықтапты. Әсіресе, шілде айында тұтынушылық мақсатында 2,6 пайыз, кәсіп жасауға 2,4, ал ипотекалық несие алғандардың саны 1,3 пайыз көбейген.
Мамандар бұл теңгенің құнсызданған сәтінде болатын қалыпты жағдай деп отыр. Бірақ әлеуметтанушылар қарапайым халықтың қарызға батуын табыстың өте төмен болуымен байланыстырады. Қазір 545 теңгеге жеткен бір доллардың бағамы соңғы айда бірден 5 пайызға қымбаттаған.
Бұл халықтың жаппай қаржы ұйымдарына қарызға батуына әкелді дейді экономистер. Әсіресе шілдеде тұтынушылық, кәсіпкерлік және ипотекталық бағытта несие алушылар саны көбейген.
Сарапшылардың айтуынша, теңге әлсірегенде шағын бизнес өкілдері кәсібіне көп қаражат салуға тырысады. Ал қарапайым халық жағдай бұдан әрі ушықпай тұрып, қаржылық мәселесін шешіп алуға үлгергісі келеді деген пікірде.
"Инфляция өсіп жатқанда негізі теңгемен қаржыландыру пайдалы болып тұр. Себебі қажет болса, біреудің бизнесіне, біреудің өзінің қажетті мәселесіне. Кері әсері төлей алмай жатса, әрине болады. Бәрі уақытында төленіп жатса, оның экономикаға өндіреді", – деді экономист Меруерт Махмутова.
Бірақ әлеуметтанушылардың пікірі мүлдем басқа. Олардың айтуынша елімізде ұлттық валютаның құнсызданып, тауар бағасының аяқ асты аспандап кетуі бірінші рет емес. Сондықтан табысы төмен азаматтар мәселесін кредит алу арқылы шешуге бейімделіп кеткен дейді. Оның үстіне банктер де несие рәсімдеу шарттарын жеңілдетіп жатқаны әсер етеді. Ал тұрғындардың әрбір қиындықта қарызға бату дұрыс үрдіс емес дейді мамандар.
Ал экономистер борышкерлер санының күрт артуы ұлттық банктің пайыздық мөлшерлемені көбейтуіне әкелуі де мүмкін деп болжап отыр.
