Кәсіби тарихшылар ғана жұрттың тарихи сауатын арттыра алады , деді Ерлан Қарин.

Мемлекеттік кеңесші Ерлан Қарин тарихты жазу кезінде тарихшылар аса мән беруі керек төрт негізгі мәселені атады. Оған сәйкес, тарих ғылымға негізделіп және объективті көз­қарас­пен жазылуы керек. Сондай-ақ, ел тарихы Қазақстанның қазіргі миссиясымен ұштасуы және кәсби стандарттар бойынша жазылғаны абзал. Бұл туралы ол "Егемен Қазақстан" басылымында жарық көрген "Ұлы дала – көшпенділер өркениетінің алтын бесігі" атты мақаласында айтты.

"Тарих, ең алдымен, ғы­лымға негізделіп жазылуға тиіс. Қандай да бір мифті жоққа шығарамыз, онымен кү­ресеміз деп екінші бір мифологияға жол бермеуіміз керек. Ашығын айтсақ, кейбір адамдар жекелеген оқиғаларды, үрдістерді, тұлғаларды тым әсірелеуге құмар. Соның кесірінен дау-дамай туындайды. Бәзбіреулер болмаған оқиғаны болды деп ойдан шығарып, рас­талмағанды ақиқат деп жатады. Ұлт мүд­десін емес, ата-бабасын дәріптеуге ұм­ты­латындар бар. Тарихи шығармаларға сеніп, оны шындық ретінде көретіндер де та­былады. Бірақ тарих дегеніміз – көркем туын­ды емес. Сондықтан мұндай келеңсіз жайт­тарға бүкіл қоғам болып тосқауыл қоюымыз керек", – деді Ерлан Қарин.

Оқи отырыңыз: Ерлан Қарин Қазақстан тарихының жеті томдығы көп ұзамай жарыққа шығатынын хабарлады

Ол, сондай-ақ, тарихта бір тұлғаның рөлін арттыру үшін екінші бір тұлғаны сынау дұрыс еместігіне тоқталды. Дәл сол секілді бір кезеңді екінші кезеңге қарсы қоюға болмайды.

"Әрине, әр заманның өз ерекшелігі бар. Тарихи оқиғаларға әрқилы ахуал әсер етеді. Замандарды бір-біріне қарсы қойып, салыстыру салдарынан ел ішінде қарама-қайшылық туындайды, қоғамның береке-бірлігі бұзылады", – деп түсіндірді мұны мемлекеттік кеңесші.

Мақалада Ерлан Қарин тарихтың бұрмалап жеткізіп жатқан псевдо-тарихшыларды сынап өтті. Мемлекеттік кеңесшінің айтуынша, олардың әлеуметтік желі арқылы ақылға қонымсыз пікір таратып, елді адастыруына жол беруге болмайды.

Оқи отырыңыз: Тарихты зерделеуде қазақ жері бірегей көшпенділер өркениетінің алтын бесігі екеніне баса мән беру керек – Ерлан Қарин

"Кейінгі кезде қоғамның тарихқа деген қызығушылығы артып келеді. Бұл – жақсы үрдіс. Бірақ оны әуесқойлар да пайдаланып жатыр. Түрлі подкаст түсіріп, әлеуметтік желіге шығаратындар, тақырыпты терең білмесе де, тарихқа баға беретіндер көбейіп кетті. Әрине, әуесқойлардың ел шежіресін насихаттау ісінде өз орны бар. Бірақ тарихтың бұрмаланбауы айрықша маңызды. Қазір псевдо-тарихшылар пайда болды. Олар да әлеуметтік желі арқылы ақылға қонымсыз пікір таратып, елді адастырып жатыр. Бұған жол беруге болмайды. Кәсіби тарихшылар ғана жұрттың тарихи сауатын арттыра алады", – деп жазды Ерлан Қарин.