4-10 шілде аралығында Астанадағы Қазақстан спорткомплексінде ауыр атлетикадан жастар мен жасөспірімдер арасында Азия чемпионаты өтуде.
Ауыр атлетикадан Қазақстан әйелдер құрамасының өкілі Аянат Жұмағали елордада өтіп жатқан жасөспірімдер мен жастар арасындағы Азия чемпионатында қола жүлдеге ие болды. Отандасымыз 77 келіге дейінгі салмақта ел намысын қорғады.
Аянат қоссайыстың қорытындысы бойынша 217 (95+122) келіні көтеріп, жастар арасындағы бәсекеде қола жүлдеге ие болды. Алтын медальді Оңтүстік Корея өкілі Хисо Джун жеңіп алды. Оның нәтижесі — 230 (102+128) келі. Ал, екінші орынды өзбекстандық Гульшодахон Дадамирзаева иеленді — 218 (96+122) келі.
94 келіге дейінгі салмақ дәрежесінде Денис Полубаяриновке тең келер ешкім болмады. Ол қоссайыстың қорытындысы бойынша 376 (163+213) келі көтеріп, жарыста топ жарды. Сондай-ақ, серпе көтеру сайысында Азия рекордын жаңартты. Екінші орынға өзбекстандық Руслан Рахматжонов орналасты — 345 (155+190) келі. Үшінші орынды Бахрейн өкілі Джон Мурилло иеленді — 334 (154+180) келі.
Сондай-ақ Қазақстан жастар құрамасының тағы бір өкілі Ерасыл Сәулебеков Астанада өтіп жатқан Азия чемпионатында жеңімпаз атанды. 88 келіге дейінгі салмақ дәрежесінде Сәулебековке тең келер ешкім болмады. Ол қоссайыс қорытындысы бойынша 344 (153+191) келі көтеріп, жарыста топ жарды. Екінші орынға өзбекстандық Бекзод Гофиржонов орналасты — 341 (151+190) келі. Үшінші орынды үндістандық Сайраж Пардеши иеленді — 338 (152+186) келі.
Турнир аясында 69 келіге дейінгі салмақта жасөспірім қыздар арасында сайыс өтті. Онда Қазақстан құрамасы екі бірдей медальға ие болды.
Қоссайыс нәтижесі бойынша 198 (87+111) келіні бағындырған Кира Данилова алтын медаль жеңіп алды.
Софья Шальгина 175 (82+93) келі көтеріп, үшінші орынға табан тіреді. Екінші орын өзбекстандық Динура Холдороваға бұйырды — оның көрсеткіші 186 (81+105) келі болды.
Айта кетейік, бұған дейін турнирде Едіге Емберді, Әлихан Әскербай, Нұржан Жұмабай алтын медальға ие болса, Ақжол Құрманбек күміс, Нұрсила Берікбол қола жүлдеге қол жеткізді.
Турнирге 27 елдің спортшылары келді. Ал, Қазақстан құрамасы бұл чемпионатқа ең үлкен құраммен, яғни 36 спортшымен қатысып жатыр.
