Жартылай финалда лондондықтар Бразилияның мықты ұжымдарының бірі "Флуминенсені" 2:0 есебімен сенімді түрде жеңді.
Клубтар арасындағы әлем чемпионатында "Челси" бразилиялық командалармен болған сериясын сәтті жалғастырып, турнирдің финалына жолдама алды. Бұған дейін топтық кезеңде лондондықтар "Фламенгодан" жеңілгенімен, ширек финалда "Палмейрасты" жарыс жолынан ығыстырған. Ал жартылай финалда қарсы алдында тұрған ұжым – осы турнирде "Интерді" сенсациялық түрде жеңген "Флуминенсе" болды.
Ойынның алғашқы бөлігінде "Флуминенсе" қорғаныста жиі қателесті. 18-минутта осы сәттердің бірін "Челси" тиімді пайдаланды. Мойсес Кайседоның белсенділігімен басталған шабуылды Жоао Педро нәтижелі аяқтап, командасын алға шығарды — 1:0. Бұл оның команда сапындағы алғашқы ресми голы болды.
Көп ұзамай тағы бір қауіпті шабуыл жасалды. Педру Нетуның сол қанаттан жасаған пасынан кейін Гюсто баспен соққы жасағанымен, қақпашы Фабио Лопес қырағылық танытты.
"Флуминенсе" де қарап қалмады. 26-минутта Эркулес қақпашыны айналып өтіп, бос қалған қақпаға бағыттаған добына Марк Кукурелья тосқауыл болып, допты сызықтан қайтарды. Тағы бір эпизодта төреші пенальти белгіледі, бірақ ВАР тексерісінен кейін шешімін өзгертіп, ойынды жалғастырды.
Екінші таймда "Челси" допқа иелік етуді жалғастырды. 63-минутта Энцо Фернандестің дәл пасынан кейін Жоао Педро алыстан тамаша соққымен дубль авторы атанды — 2:0. Бұған дейін Эвералдоның соққысын Роберт Санчес қайтарған болатын.
Қалған уақытта да "Челси" ойынды толық бақылауда ұстап, қарсыласына мүмкіндік берген жоқ. "Флуминенсенің" шабуылшылары соңғы сәттерде бағыттаған бірнеше соққыны мүлт жіберді.
Осылайша, "Челси" екі доп айырмасымен жеңіске жетіп, финалға шықты. Енді олар шешуші матчта "ПСЖ" немесе "Реал Мадридпен" кездеседі.
