Таразда футзалдан Қазақстан кубогінің финалдық сайысы өтті. Бас жүлдені «Семей» мен «Ақтөбе» сарапқа салды, деп хабарлайды Egemen.kz.
Жартылай финалда қос команда да өз қарсыластарын әзер ұтқан еді. «Семей» «Атырауды» 4:3 есебімен әупірімдеп жүріп жеңді. Ал «Ақтөбе» даңқы алысқа жайылған Алматының «Қайратынан» айласын асырды. Бұл кездесуде 5:4 есебі тіркелді.
Финалдық матчта семейліктердің шеберлік деңгейі қарсыластарына қарағанда бір бас жоғары екені бірден аңғарылды. Ойынның 5 және 13 минуттарында Дедезиньо қатарынан екі гол соғып, дубль авторы атанды. Бірінші тайм аяқталуға шақ қалғанда Габриэль Кандидо мен Лео Игита нысананы дәл көздеді.
Футзалдан Қазақстан кубогінде тосын нәтиже тіркелді
Үзілістен кейін Марсело Аугусто дос Сантос есепті 5:0-ге жеткізді. Тек содан кейін барып қана Абай облысынан келген команда қарқынын бәсеңдетті. Бәсекенің соңына қарай «Ақтөбенің» ойыншылары сәл болса да есепті қысқартты. Атап айтсақ, 35 минутта Егор Нулет мергендік танытса, 35 минутта Қайрат Иманалин пенальтиді сәтті орындады. Қорытынды есеп – 5:2. Сөйтіп, «Семей» Қазақстан кубогін иеленді.
