Суданда тырысқақ өршіп тұр. Елдегі барлық 18 штаттың 13-інде жағдай күрделі. ДДСҰ келтірген мәліметке қарағанда былтыр шілде айынан бері 70 мыңға жуық адам кесел жұқтырған. Оның 1800-ден астамы қайтыс болды.
Бұған 2 жылдан бері жалғасып жатқан азаматтық қақтығыс себеп. Соның кесірінен елдегі емдеу орындарының 70-80%-і жұмысын тоқтатқан. Атыс-шабыс салдарынан электр станциялары бүлініп, ауызсу мен жарық жүйесі істен шыққан. Тұрғындар өзеннен су ішіп амалдап жүр. Бұл жағдай аурудың таралуына әсер етіп отыр.
Хамад Адель, Басаир ауруханасының дәрігері:
- Күнделікті ауруханаға холера жұқтырған 30-ға жуық, кейде тіпті 60-70-тей науқас түседі. Ауызсу мен электр желісінің зақымдануы емдеу процесін қиындатып отыр. Біз тұтынып отырған су лас, мүлдем тазартылмаған. Бұл олардың денсаулығына кері әсер етеді.
Суданда қақтығыс 7 күнге тоқтайды
Ал Судан әскери үкіметі Эль-Фашир қаласында гуманитарлық дағдарысты жеңілдету үшін атысты 1 апта тоқтатуға келісті. Associated Press агенттігінің мәліметіне қарағанда БҰҰ-ның Бас хатшысы Антониу Гутерриштің өтінішінен кейін Судан қарулы күштерінің генералы Абдель Фаттах әл-Бурхан келісім берген. Дегенмен қарсы тарап бұл шешімді қалай қабылдайтыны әзірге белгісіз. Эль-Фашир қаласы қақтығыс басталғалы әскерилердің бақылауында. Текетірес кесірінен мыңдаған адам ашқұрсақ отыр.
