1973 жылы Стокгольмде алты күн бойы төрт адамды кепілге алған швед банк тонаушысы Кларк Улофссон 26 маусымда қайтыс болды. Бұл оқиға кейін "Стокгольм синдромы" деген ұғымның пайда болуына себеп болған еді, деп хабарлайды Zakon.kz.
CTV News дерегінше, марқұмның туыстары Улофссонның 78 жасында, ұзаққа созылған сырқаттан кейін Швеция ауруханасында көз жұмғанын мәлімдеді.
Улофссон өмірінде бірнеше рет қылмыстық жауапкершілікке тартылған – оның ішінде тонау, кісі өлтіруге оқталу, есірткі саудасы және шабуыл жасау фактілері бар. Ол өмірінің жартысынан көбін түрмеде өткізген. Улофссон әлемге 1973 жылы 23 тамызда Стокгольмде банк тонау әрекетінен кейін кеңінен танымал болды.
Сол кезде Янне Олссон есімді бұрынғы тұтқын жалғыз өзі қаржы ұйымының кеңсесін басып алып, үш әйел мен бір ер адамды кепілге алған. Ол биліктен өзінің бұрынғы камералас серігі Улофссонды банкке алып келуді талап еткен. Полиция бұл талапты орындағаннан кейін, қарақшылар алты күн бойы адамдарды ғимарат ішінде ұстаған.
Кепілде болған Кристин Энмарк есімді әйел кейіннен өз кітабында банкке Улофссон келген сәтте оны құтқарушы ретінде қабылдағанын жазды. Ол кезде 23 жастағы Энмарк бірнеше рет билік өкілдерімен телефон арқылы сөйлесіп, қарақшылардың талаптарын орындауды сұраған әрі оларды қорғаған.
Энмарк қарақшылардан қорықпайтынын, оларға толық сенетінін мәлімдеген. Оның айтуынша, кепілдегі адамдар қарақшылармен жақсы уақыт өткізген – олар әңгімелесіп, бірге дойбы ойнаған. Кейіннен кепілдегілер Улофссон мен Олссонға қарсы куәлік беруден бас тартқан.
Содан бері сарапшылар "Стокгольм синдромы" нақты психикалық бұзылыс па, әлде ауыр психологиялық жағдайдан қорғану механизмі ме деген тақырыпта пікір таластырып келеді.
