Қазақстандық жеңіл атлет таяуда ғана Грекияда өткен жарыстан да жүлделі оралған еді.
Польша астанасы Варшавада өткен Konopacka Warsaw Classic 2025 халықаралық жарысында Қазақстан құрамасының өкілі Кристина Овчинникова биіктікке секіруден күміс медаль жеңіп алды.
Бұл дода World Athletics Continental Tour сериясының Bronze деңгейіндегі ресми турнирлерінің бірі саналады және тек әйелдер арасында ұйымдастырылды.
Овчинникова 185 см биіктікті бағындырып, екінші нәтиже көрсетті. Ал алтын жүлде украиналық Юлия Левченкоға бұйырды – оның көрсеткіші 192 см. Қола жүлдені жергілікті спортшы, польшалық Алисия Высоцка иеленді, ол да 185 см нәтижемен үштікке ілікті. Алайда, техникалық көрсеткіштері бойынша отандасымыздан кейінгі орында қалды.
Айта кету керек, бұл Кристинаның биылғы маусымдағы жоғары нәтижелерінің бірі. Бұған дейін ол Грекияда өткен халықаралық турнирде жеңіс тұғырынан көрінген болатын. Варшавадағы нәтиже оның бабында екенін тағы бір мәрте дәлелдеді.
