Тимур Сүлейменов криптовалюта саласында кешенді құқықтық режим әзірлеу туралы бастама көтерді.
Ұлттық банк төрағасы Тимур Сүлейменов мәжіліс депутаттарының сауалына берген жауабында заңсыз "сұр" криптонарықпен және тіркелмеген криптопровайдерлермен қалай күрес жүргізіп жатқанын түсіндірді.
Банк төрағасының айтуынша, Ұлттық банк әлеуметтік желілер мен цифрлық платформалар арқылы жастарды қаржылық сауаттылығы төмен азаматтарды заңсыз криптонарыққа тартып жатқан блогерлер мен криптокоучтер аз емес. Олар негізінен жұмысын тіркелмеген, яғни лицензиясы жоқ криптопровайдерлер арқылы жүзеге асырады.
"Жасанды интеллект туралы" заңның жобасына ілеспе заң жобасы шеңберінде қолданыстағы заңнамаға бірқатар түзетулер енгізу көзделген. Осы заң жобасы бойынша түзетулер лицензиясы жоқ және тіркелмеген криптопровайдерлер арқылы криптоактивтермен операциялар жасағаны үшін жеке әкімшілік және сол сияқты қылмыстық жауапкершілікті белгілеуге, сондайақ цифрлық активтерді жарнамалауға байланысты шектеулерді енгізуге бағытталған", – деп жауап берді Тимур Сүлейменов.
Оның сөзінше, жастардың цифрлық активтерге деген қызығушылықтың артуына криптонарық арқылы "жылдам байып кету" мүмкіндіктері туралы жалған ақпараттың көптеп таралуы негіз болып отыр. Осыған орай, Ұлттық банк "жалған криптокоучтардың" қызметімен, сондай-ақ заңсыз криптосервистермен күресетін кешенді құқықтық режимді әзірлеу қажет деп санайды.
"Осыған байланысты Ұлттық банк жоғарыда аталған заңнамалық түзетулер шеңберінде тиісті құқықтық тетіктер мен нақтылауларды пысықтау мүмкіндігін қарастыруды ұсынады, бұл біздің ойымызша, цифрлық активтерді реттеу негіздерін нығайтуға, азаматтардың (әсіресе жастар мен ХӘОТ) қорғалу деңгейін арттыруға және Қазақстан Республикасында өркениетті криптонарық қалыптастыруға ықпал етуге мүмкіндік береді", – деді Ұлттық банк төрағасы.
Оқи отырыңыз:
Қазақстандық криптовалюта: Қашан шығады және онымен не төлеуге болады
Қазақстанда заңсыз майнинг фермасында 500 миллион теңгеге жуық криптовалюта өндірілді
