Криптонарық саласында биткоинның бәсі жоғарылап, танымалдығы артып келеді. Қазір бір биткоинның құны 113 мың доллар. Бұл теңгемен 61 миллиондай. Әлем елдерінде электронды ақшаға не себепті сұраныс жоғары?
Әлемде цифрлы валюта нарығы қарқынды дамып келеді. Investing платформасының дерегіне сүйенсек, қазірде 9467 криптовалюта бар. Биткоин көш бастап тұр. Екінші орында эфириум. Оның құны 3,5 мың доллар. Эфириум валюта ғана емес, сандық бағдарламалар жасайтын платформа ретінде де танымал. Бұдан бөлек, банктер мен қаржы мекемелері қолданатын XRP валютасы бар. Ол Ripple сынды халықаралық төлемдер жүйесімен тығыз байланысты. Қазірде криптонарықта бір XRP құны 3 доллар тұрады.
Криптовалюта нарығының қарқынды даму үдерісін сарапшылар бірнеше себеппен түсіндіреді. Мәселен, электронды ақшалар ешбір банкке тәуелді емес. Сондай-ақ кез келген қаржылық операцияларды орындау кезінде кедергілер аз. Әсіресе, жаһандық пандемия кезінде биткоин көпшілік үшін тиімді инвестицияға айналды. Барлық қызмет түрі онлайн жұмыс істеген уақытта қағаз ақшаның орнына электронды валюта айналымда болды. Сөйтіп, биткоинның деңгейі алтынмен тең болды. 2008 жылы пайда болып, 2009 жылы ең алғашқы блогы жасалды. Ол уақытта криптобиржа саласы болған жоқ.
Қазірде биткоин тек инвестиция құралы емес. Экономиканың маңызды тетігіне айналған. Мәселен, Қытай мен Үндістанның арасында орналасқан шағын корольдік Бутан биткоин өндіріп, оны өзге елдерге сату арқылы табысқа кенеліп отыр. 2 жыл бұрын биткоин саудасынан түскен 100 миллион доллар қаражатты мемлекеттік қызметкерлердің жалақасын көтеруге жұмсаған. Жалпы бұл елде криптовалюта өндіру су электр станцияларының көмегімен жүзеге асады. Жазда өзендерде су көп болған кезде, ГЭС артық энергия өндіреді. Бұл майнинг үшін өте тиімді. Arkham сараптамалық платформасының мәліметіне сүйенсек, биыл сәуірде Бутан иелігінде 7697 биткоин болған.
Криптонарық айналымы былтыр 2 миллиард доллардан асты. «Бұл көрсеткіш алдағы 5 жылда өспесе, кемімейді», - дейді сарапшылар. Өйткені криптовалютаға ірі инвестрлор тарапынан қызығушылық артып келеді. Сондай-ақ нарықта әлемдік валюта бағамы доллар құнының қымбаттауы да әсер етеді. Дональд Трамп өткен айда тұрақты бағаны ұстап тұратын криптовалюталарды заңдастыру туралы жарыққа қол қойған болатын. Осылайша, Ақ үй әкімшілігі доллардың әлемдік резервтік валюта ретіндегі позициясын сақтап қалғысы келеді. Трамп сайлауға дейін АҚШ-ты әлемдік криптовалюта астанасына айналдырамын деп уәде беріп, көктемде цифрлық активтердің стратегиялық резервін құруды тапсырды.
Авторлары: Фариза Жанғанаева, Сандуғаш Байғуаныш
