Ақтауда прокуратура қызметкерлері қоғамдық орындарда қабылдау жүргізді, деп хабарлайды 24KZ. 15-шағынаудан жағажайында шатыр тігіліп, сол жерде қадағалаушы орган өкілдері тұрғындардың мәселесін тыңдады. Көпшілік көтерген көкейтесті сауалдарды тіркеп, олардың заң жүзінде шешілуіне ықпал етуге уәде берді. Осылайша бірер сағатта 30-ға жуық азаматқа кеңес берілген.
Айта кету керек, Маңғыстау облысының барлық елді мекенінде «Заң мен тәртіп» қағидаты аясында ұйымдастырылған қабылдау шарасына 200-ден астам адам келген.
Мерген Меңдіғалиев, облыс прокуратурасының басқарма бастығы:
- Жалпы облыс көлемінде, елді мекендерде, халық көп шоғырланатын жерлерде азаматтарды қабылдаймыз. Ол жерде көкейтесті мәселелері, сұрақтары бойынша жедел жауабын беріп, олар бойынша қажет болған жағдайда тиісті шараларды қамтамасыз етеміз.
Мұса Ташмұқанов, қала тұрғыны:
- Уәкілетті мемлекеттік органдарға кірудің өзіне әжептәуір уақыт кетеді. Енді керісінше, прокуратура қызметкерлері қала жағажайында қабылдау жүргізіп жатыр. Бұл тұрғындарға өте ыңғайлы. Мен де өз мәселемді көтердім. Кейбір сұраққа қатысты құжаттарды кеңсеге алып келуімді өтінді. Оған уақыт та белгіленді.
