Біріккен ұлттар ұйымының бітімгерлік миссияларына 800-ге жуық қазақстандық жауынгер қатысқан, деп хабарлайды 24kz.

Қазір 158 әскери қызметші әлемдегі қақтығыс ошақтары мен даулы аймақтарында тұрақтылықты сақтау үшін атсалысып жүр. Соның басым бөлігі Сирия жерінде.

Бітімгерлеріміздің жағдайы қалай? Оларға қандай міндет жүктелген?

Мерей Қанапия, тілші:

- Дәл қазір Сириядағы даулы аймақ саналатын Голан жоталарында 139 қазақстандық жауынгер жүр. Олар 2 айдан бері бітімгерлік қызметтерін атқарып жатыр. Голан жоталары – Сирия мен Израиль арасында орналасқан даулы аймақ. БҰҰ қос елдің алауыздығын өршітпеу үшін бейбіт миссияға 13 елдің бітімгерлерін тартты. Дәл қазір онда сәуір айында жасақталған еліміздің Екінші ұлттық контигенті аймақтарды патрульдеу, тосқауыл бекеттер ұйымдастыру, бітімгерлік базаны күзету мен бейбіт келісімдердің сақталуын қамтамасыз етіп жатыр.

Жәнібек Нұрланов, Екінші ұлттық контигенттің командирі:

- Жауапты аймақ Израиль мен Сирияның ортасында орналасқан. Ұзындығы 80, ені 40-50 шақырым. Біздің рота қолбасшының резерві ретінде қолданылады. Бізге берілген тапсырма БҰҰ орналасқан әскери базаларды күшейту, эвакуациялау, тасымалдау, қауіпсіз жерлерге апарып-алып қайту.

Қазақстандық бітімгерлердің арасында әйелдер де бар. Олар күннің ыстығына қарамастан ерлермен тең дәрежеде қызмет етіп жатыр. Соның бірі әскери дәрігер – Анаргүл Күшер.

Анаргүл Күшер, бітімгер:

- Осы бітімгершілік миссиясына 5 жылдай дайындалып келдім. Менің міндеттерім – зардап шеккен әріптестеріме медициналық қызмет көрсету, медициналық эвакуация істеу. Біздің ротамызда 2 әйел бітімгер бар. Біреуі мен және ефрейтор Жанна Санина. Ол аспаз боп қызмет атқарады.

Енді статистикаға тоқталатын болсақ... Сирияда болған бірінші контингент бір жыл ішінде 618 тапсырма орындаған. Одан бөлек, саперлар аумақты 400-ден астам жарылғыш заттан тазартып, залалсыздандырған. Ал қазіргі екінші ротация 2 айда 86 тапсырма орындаған.

Жәнібек Нұрланов, Екінші ұлттық контигенттің командирі:

- Жарылғыш заттар көп. Әрбір патрульдеу кезінде біз координацияларын, нүктелерін қойып, картадан алып келеді. Одан кейін инженерлік топтарды жібереміз. Біздің жауапты аймақта бүгінге дейін ешқандай қақтығыстар, төтенше жағдайлар орын алған жоқ.

Расында, бітімгерлердің қызметі оңай емес. Әсіресе, ауа температурасы 40 градустан асатын күннің ыстығында қиын. Соған қарамастан бейбітшіліктің символы саналатын көк каска мен бронды кеудешені шешуге қатаң тыйым салынған. Әрі барлық нұсқау тек ағылшын тілінде жүргізіледі.

Анаргүл Күшер, бітімгер:

- Бітімгершілік миссияда ағылшын тілін білу өте маңызды. Осы миссияға келер алдында 4 жыл ағылшын тілін үйреніп, сол қазір маған жақсы қолдау көрсетіп жатыр.

Қазақстан – халықаралық бітімгерлік миссиясына қатысатын Орталық Азиядағы жалғыз мемлекет. Жауынгерлеріміз осыған дейін Ирак, Ливанда да бой көрсетті. Ал Сириядағы бітімгерлер келесі жылы сәуір айында елге оралады.

Авторы: Мерей Қанапия