Орталық алаңға орнатылған бас шыршаның биіктігі 18 метр.
Оны безендіру үшін ұзындығы 4 шақырымға жететін жарықшам-гирлянда ілінді. Айналасы ертегі кейіпкерлеріне толған алаңда балаларға арналған аниматорлар мен музыкалық қойылымдар ұйымдастырылды. Жергілікті өнерпаздар мен елге танымал сахна жұлдыздары өнер көрсетті.
Мерекелік ойын-сауықтық бағдарламаның шымылдығы бас шыршаның шамын жағу рәсімімен түрілді. Төгірек қызылды-жасыл шамдармен көмкеріліп, ертегі әлеміне айналды. Аяз ата мен Ақшақар балалармен бірге би билеп, шаттық сыйлады.
Нұрлан Есіркепов, қала тұрғыны:
- Жақсы ұйымдастырылған. Керемет, әдемі барлығы. Көшелердегі безендіру, алаңдағы безендірудің барлығы ойдағыдай, өте тамаша әсер қалдырып отыр. Барлығыңызды 2026 жыл жаңа жылдарыңызбен құттықтаймын.
Жаңа жылдық кеш эстрада әншілерінің қатысуымен концерттік бағдарламаға ұласты. Қала тұрғындарын құттықтап, бақ-береке тіледі. Көпшілікке ән мен биден көтеріңкі күй сыйлады.
Серік Ибрагимов, әнші:
- Шымкент халқының ықыласы өте бөлек, ерекше. Жалпы көңіл-күйлері үнемі 200% жүреді деп ойлаймын. Сондықтан шама келгенше көңілінен шығуға тырыстық. Ең бастысы, жаңа жыл жақсылығымен келсін дегім келеді.
Осындай ойын-сауықтық бағдарлама қаланың барлық ауданында ұйымдастырылды.
Нұрсұлтан Мұхамеджан, Нұрмахан Бекмұратов
