Спорттағы жоғары жетістіктерден бастап мәдени және әлеуметтік бастамаларға дейін.
Қазақстандықтар өтіп бара жатқан жылды қорытындылап, «Жыл адамы» кім екенін анықтады. Бұл сауалнаманы Ұлттық талдау орталығы жүргізген болатын.
Жыл адамы – Президент. Ұлттық талдау орталығы жүргізген сауалнама барысында қазақстандықтардың дені Мемлекет басшысы Қасым-Жомарт Тоқаевты осы атаққа лайық деп таңдаған. Яғни отандастарымыз президентті ел өміріндегі басты тұлға ретіндегі ролін мойындап отыр.
Сонымен қатар қазақстандықтар спорт пен мәдениет өкілдерін, сондай-ақ азаматтық ерлік танытқан жандарды да ерекше атап өтті. Олардың қатарында чемпиондар лигасының негізгі кезеңіне жолдама алып, жанкүйерлерге жарқын эмоция сыйлаған «Қайрат» футболшылары да бар. GGG, яғни Геннадий Головкин мен әлемге әйгілі әнші Димаш Құдайберген де осылардың қатарынан табылды.
Ал адам өміріне араша түскен жандар да жылдың басты тұлғаларының тізімінде. Нақтырақ айтқанда, оқыс оқиға салдарынан жарақат алған жандарға көмекке келіп, өзі бақилық болған фельдшер Ұлдана Мырзуан мен Алматы әуежайында кепілге алынған әйелді құтқаруға атсалысқан Мұса Әбдірайым есімдері ел есінде ерекше сақталған. Бұл қоғамның кәсібилікті, батылдықты және адам өміріне деген жауапкершілікті жоғары бағалайтынын көрсетеді.
2025 жылдың мәдени трендтері. Биыл отандық киноның тынысы кеңінен ашылып, көрермендерге қызықты туындылар жол тартқан болатын. Киносүйер қауым жоғары бағалаған фильмердің ішінде «Ауру», «Ыстық ұя», «Патруль. Последний приказ», «Офсайд» сынды картиналар бар. Ал ең үздік орындаушылардың рейтингін Димаш Құдайберген бастап тұр. Сонымен қатар, Қайрат Нұртастың да есімі тыңдарман арасында жиі аталады.
Ал жылдың басты сөздері «цифрландыру», «бірлік», «жасанды интеллект» және «даму». Сарапшылардың пікірінше, бұл таңдаулар әлеуметтік және технологиялық реформалардың көпшілік үшін нақты іске асып жатқанын айғақтайды.
ЦИТАТА
Жылдың басты сөздері «даму», «цифрландыру», «Жасанды интеллект» және «табыс» прогресс пен өсуге деген процесті айқындайды. Азаматтар позитивті көңіл-күйде болып, 2026 жылдан өзгерістер мен жетістіктер күтуде. Сондықтан да, қиындықтарға қарамастан, 2025 жыл нақты өзгерістер мен прогрестің жылы болды. 2026 жылды қарсы ала отырып, қазақстандықтар оптимизмге толы, алға жылжуға дайын, тұрақты даму, технологиялық жетістіктер және әлеуметтік табыстар үшін қолайлы жағдай жасауға ниетті.
Әлеуметтанушылар жүргізген сауалнама қорытынысы Президентке, спорт жұлдыздарына және мәдениет қайраткерлеріне көрсетілген құрмет 2025 жылы елде түрлі салада ілгері жылжу байқалғанын көрсетеді. Сонымен қатар, қазақстандықтардың отбасылық дәстүрлері де өз маңызын жоғалтқан жоқ. Сауалнамаға қатысқандардың 85 пайыздан астамы 2026 жылды үйде, отбасылық ортада қарсы алатынын айтқан.
Риат Шони
