Биыл Шығыс Қазақстан облысында 100-ден астам көлік өртеніп кетті. Оқыс оқиғаның дені Өскеменде тіркелді. Төтенше жағдайлар мамандарының дерегінше, отқа оранған көліктердің көбі газбаллонын заңсыз орнатқан. Қазір аймақта сұйытылған отын жабдығын қондыратын станциялардың қызметін бақылау шаралары күшейтілді.
Бұл кадрлар өрт сөндіру қызметінің мұрағатынан алынды. Отқа оранған көліктердің көбі ескі. Әрі жүргізушілер газбаллонды өз бетімен орнатқан. Биыл полицейлер 960 заңбұзушылықты әшкерелеп, кінәлі тұлғаларды әкімшілік жауапқа тартқан.
Жол-техникалық инспекция қызметкерлері құтқарушылармен бірлесіп, автогаз жабдығын орнату станцияларында бақылауды күшейтті.
Сергей Коваленко, ПБ жол-техникалық инспекциясы бөлімінің бастығы:
- Облыс аумағында жыл басынан бері 102 автокөлік өртеніп кетті. Құтқарушылардың жедел әрекетінің арқасында адам шығыны тіркелген жоқ. Көлікті газбен жабдықтау қондырғысын тиісті сертификаты бар компаниялар ғана орнатуы тиіс. Газ құю станцияларын да жіті назарға алдық.
Автогаз құю станцияларында тұрмыстық газ баллонды толтыруға тыйым салынған. Көп жағдайда станция иелері қарапайым техникалық қауіпсіздік ережелерін ескере бермейді. Мысалы мына жерде құрамы белгісіз сұйықтық толы қойма кассаға тым жақын тұр. Сақтау орнының айналасы қоршалмаған.
Амангелді Еңсегенов, ТЖД бастығының орынбасары:
- Газқұю станцияларында жекеменшік үйлердегі баллондарды толтыру сәттері бар. Газ баллондарды мұндай жерде толтыруға болмайды. Сондықтан біз осындай газқұю станциялары түсіндіреме жұмыстарын жүргізіп жатырмыз.
Өскеменде құтқарушылар паркингтерді аралап, газбаллон жабдығы қойылған көліктердің бар-жоғын тексереді. Сол жерде тұрғындармен жүздесіп, түсіндірме шараларын жүргізеді. Өртенген машиналардың фото және бейнекадрларын көрсетіп, қатердің алдын алуға үндейді.
Авторлары: Талғат Исламұлы, Вячеслав Ветлугин, Дмитрий Пыхтин
