Қоғамда вейп пен электронды шылымға әуестенетіндердің саны артқан. Олардың дені жастар мен жасөспірімдер. Адам денсаулығына аса қауіпті саналатын қолайсыздықпен күрес туралы Өңірлік коммуникациялар қызметінде өткен баспасөз мәслихатында Алматы қалалық психикалық денсаулық орталығы директорының орынбасары Роза Тәтиева мәлімдеді.
Қалада никотин өнімдерінің таралуына қарсы бірнеше жүйелі бастама қолға алынғанымен, зиянды затқа әуестенгендердің саны азаймай тұр. Сондықтан маман, ұқықтық тетіктерді әлі де болса барынша күшейту қажет деп есептейді.
Осы бағытта іске асқан «Вейпсіз жастық» жобасы аясында вейп-шоптар мен кальян-барларға рейдтер ұйымдастырылған. Соңғы бірер айдың өзінде, қоғамдық орында кальян шеккен 100 адамға айыппұл салыныпты.
«Кей жастар кальянды қауіпсіз деп қабылдайды. Алайда бір рет кальян шегу — 100 темекі тартқанмен тең. Оның түтінінде никотин, шайыр және ауыр металдардың мөлшері темекіден 3–5 есе көп болуы мүмкін. Кальянды жабық бөлмеде шеккенде, оның түтіні инфекциялық аурулардың таралуына жағдай жасайды. Ал бір мүштікті бірнеше адамның қолдануы — жұқпалы аурулар үшін тікелей жол. Кальян – ағзаны улайтын құрал ғана емес, жастарды тәуелділікке итермелейтін әлеуметтік құбылыс. Ол темекіден де қауіпті», – деиді Р. Тәтиева.
Сарапшылардың пікірінше, адам зиянды әдеттен неғұрлым ертерек бас тартса, оған қайта оралу ықтималдығы соғұрлым азаяды. Сондықтан жастардың салауатты өмір салтын ұстануына жағдай жасау — мемлекет пен қоғамның ортақ әрі маңызды міндеті.
