ҚР Денсаулық сақтау министрлігі

Орталық Азия елдерінің ортақ донорлық қан базасы құрылуы мүмкін. Жоба мұқтаж жандардың қажетті қанға қолжетімділігін қамтамасыз етпек. Ташкентте көрші мемлекеттердің денсаулық сақтау министрлері бас қосқан жиын өтті. Келелі кеңеске Дүниежүзілік денсаулық сақтау, ЮНИСЕФ сияқты беделді ұйым өкілдері қатысты.

Орталық Азия елдерінде онкологияға шалдыққан науқастарды бастапқы кезеңде анықтау көрсеткіші 0,3-0,6% ғана құрайды. Бұл Еуропамен, Америка және Азияның дамыған елдерімен салыстырғанда біраз төмен. «Мұның басты себебі: тұрғындар скринингтік тексерулерден уақытылы өтпейді», – дейді дәрігерлер. Ал онкология жасарған сайын онымен күресу де қиындап барады. Жаңаша көзқарас пен ғылыми әдіс керек.

Гүлфайруз Оразбаева, ҚР ДСМ Акушерия, гинекология және перинатология ғылыми орталығының басқарма төрағасы:

- Біз өз тарапымыздан көрші елдерге біріккен ғылыми зерттеу жобаларын жасауды ұсындық. Бұл бізге сирек кездесетін онкологиялық ауыруларды емдеуге мүмкіндік береді. Сондай-ақ кадр даярлауда ортақ бағдарламаның қажеттілігін сөз еттік. Ең бастысы көрші елдермен өзара ынтымақтастық жасауға уағдаластық. Себебі қазір Орталық Азия аймағында онкологияға шалдыққан балалар мен жасөспірімдердің қатары өсіп барады.

Әлбетте, еуропалық клиникалар медициналық қорытындыларымен бөліссе де, ауыруды ауыздықтауға келгенде көп нәрсені жасыратын көрінеді. Сондықтан мемлекеттерге өзіндік ем көрсету әдісін жасауға тура келеді.

Венера Алтынова, Ана мен бала ұлттық ғылыми орталығының онколог дәрігері:

- Қазақстанды өзге елдермен салыстыратын болсақ, бізде медицинаға қолжетімділік әлдеқайда жоғары. Тұрғындар тегін емделеді. Әсіресе мемлекеттің балаларға жасайтын қамқорлығы ерекше. Біз Орталық Азия, басқа да елдердегі әріптестерімізбен сөйлескенде оларда мұндай жеңілдіктің жоқ екеніне көз жеткіземіз.

Жиын барысында Қазақстан мен Өзбекстан денсаулық сақтау министрлерінің екіжақты кездесуі өтті. Тараптар Орта Азияда ортақ донорлық қан базасын құру идеясын құптады. Сондай-ақ кардиология, онкология, дәрі-дәрмек секторында өзара тәжірибе алмасып, біріккен жобалар жасауға келісті.

Авторы: Дулат Нуркин