Амстердам қаласында Алматы қалалық музейлер бірлестігінің «Дәстүр жалғастығы: бабалар аманаты» атты көрмесі ашылды .
Мәдени шара Алматы қаласы әкімдігі, Қазақстан мен Түркия елшіліктері және Юнус Эмре институтының қолдауымен ұйымдастырылды. Көрмеде Алматы мұражайларының қорынан алынған 70-тен астам бірегей жәдігер қойылған. Олардың қатарында қазақ халқының тұрмысы мен дәстүрін көрсететін этнографиялық бұйымдар, зергерлік әшекейлер мен көне музыкалық аспаптар бар. Амстердам тұрғындары қазақ мәдениетінің бай мұрасымен екі апта бойы таныса алады. Көрме аясында ұлы композитор Нұрғиса Тілендиевтің 100 жылдығына арналған концерт ұйымдастырылды.
Ләззат Сағындықова, Алматы қаласы музейлер бірлестігінің директоры:
- Көрменің негізгі мақсаты – екі ел арасындағы мәдени ынтымақтастықты нығайту және қазақ халқының мәдениетін, тарихын әлем жұртшылығына насихаттау. Алматы қаласы мұражайлары бірлестігі қазақ халқының мәдениетін, тарихын насихаттау мақсатында кейінгі үш жылда 9 мемлекетте 11 халықаралық көрме ұйымдастырды. Бүгінгі іс-шарамыз халықаралық ынтымақтастықты нығайту жолындағы жұмыстың жалғасы.
