Шығыс Қазақстан облысында 3 ірі жылу энергия орталығын жөндеуге 11 миллиардд теңгеден астам қаражат бөлінеді, деп хабарлайды 24kz.
Өскемен мен Риддерде жұмыстар басталып кетті. Үкімет резервінен бөлінетін қаржыға 18 қазандық, 13 турбина жаңартылады.
Риддердегі жылу электр орталығы 70 жылдан бері жұмыс істеп тұр. Ескі нысанды жаңғыртпаса, қыста халық жылусыз қалуы әбден мүмкін. Орталықтың жабдықтарын жөндеуге Үкімет резервінен бөлінген қаржы жұмсалатын болды. 3 миллиард теңге жұмсалады. Екі қазандық жаңғыртылады.
Станция соңғы 20 жылда алғаш рет жылыту маусымын 6 қазандықпен бастамақ. Яғни, толық қуаттылыққа көшеді.
«Жаңғыртудан кейін нысанның тозу көрсеткіші 35%-ке төмендейді», -дейді энергетиктер. Электр энергиясын өндіру 25 мегаватқа жетеді. Енді мұндағы мамандар турбина цехының кейбір жабдығын және жылу құбырларын ауыстырмақшы.
Кирилл Голота, Риддер қаласының ЖЭО бас инженері:
- Жылу жүйелеріне қатысты көп жұмыс жоспарланып отыр. Ол жалпы 23 учаскені, яғни 11 шақырымды қамтиды. Осыдан үш жыл бұрын қыс кезінде 74 апаттық жағдай тіркелген еді, ал өткен маусымда тек 7 оқиға болды.
Ал Өскемен мен Согра жылу электр орталығында апат тудыруы мүмкін ақаулар жойылды. Енді жабдықтардың тозуын 2%-ке төмендету үшін модернизацияның жаңа кезеңі басталады. «70-80 жылдық тарихы бар мекемелер үшін бұл үлкен көрсеткіш», — дейді жауаптылар.
Рузиля Абдурашитова, облыстық энергетика және ТҮКШ басқармасы бөлім басшысы:
- Жылу электр орталықтарын жөндеуге 11 миллиард теңге қарастырылып отыр. Тариф есебімен қоса алғанда, барлық қаражат көмегімен 18 қазандық, 13 турбина жөнделеді.
Алдағы жылдары Өскемен жылу орталығында жаңа қазандық бой көтереді. Осылайша, өлкедегі жылуэлектр бекеттерін кезең-кезеңмен жаңғырту жоспарланған.
Авторлары: Эльмира Ахметова. Дмитрий Пыхтин
