Шри-Ланканың Коломбо қаласында Дүниежүзілік әскери спорт ұйымының 80-конгресі аяқталды.

Жиында әскер спортының келешегі талқыға түсті. Қазақстан делегациясы да осы конгресте маңызды кездесулер өткізді.

Әлемде орын алып жатқан гесаяси ахуал ушығып, сын-қатерлер күшейіп тұрған уақытта СИЗМ конгресінің ұйымдастырылуы өте маңызды еді. Өйткені Дүниежүзілік әскери ұйымның о бастағы ұстанған мақсаты спорт арқылы әлем әскерлерінің қарым-қатынасын нығайтып, достық пен бейбітшілікті насихаттау болатын. 141 елдің өкілдері қатысқан жиынның негізі ұраны да осы болды. «Ұрыс-соғыс емес, бейбітшілік пен тыныштықты ту етіп, тек спорт алаңдарында ғана күш сынасайық» деген.

Лотфи Бугерра, Тунис делегациясының жетекшісі:

- Иә, әскердің күшін майданда емес спорт аренасында сынаған дұрыс. Осы конгресте әлемді бейбітшілікке үндейтін жақсы-жақсы бастамалар қолға алынды. Енді қатардағы сарбаздардан кәсіпқой спортшы шығару біздің міндет. Алғашқы қадамды Астанада өтетін әлем біріншілігінен бастаймыз.

Туре Мохамед, Гвинея делегациясының басшысы:

- Қазақ күресінің таныстырылымына куә болдық. Біздің әскерлердің қолынан келеді деп нық сеніммен айта аламын. Сондықтан Гвинеядан қазақ күресінің қауымдастығын ашуды жоспарлап отырмыз. Әскерлер арасындағы қарым-қатынас осылай дамиды.

СИЗМ Халықаралық Олимпиада комитетінен кейінгі ықпалды ұйымдардың бірі. 80-конгресте әлемдік әскери спорт ұйымы қазақ күресіне төрден орын берді. Яғни Қазақстан делегациясын бастап барған Спорт комитетінің басшысы Арман Әбеуов 141 елдің өкілдері алдында шеберлік сабағын өтті. Күрестің бірнеше түрінен әлем чемпионы болған маман қазақ күресінің қыр-сырын көпшілік алдында жайып салды. Сондай-ақ делегация басшысы Арман Сайлауұлы әр елдің делегация өкілдерімен жеке кездесулер өткізіп, маңызды келісімдерге келді. Мысалы, қазақ күресінен әскерилер арасындағы екінші әлем чемпионаты келер жылы Мәскеуде өтетін болды.

Артём Громов, РФ Қорғаныс министрлігі орталық әскери спорт клубының басшысы:

- Бүгін қазақстандық әріптесіммен маңызды кездесу өткіздік. Біздің мақсат қазақ күресімен самбо спортын СИЗМ нің күнтізбелік жарыс кестесіне енгізу. Осы бағытта алдағы уақыттары бірлесе жұмыс жасауға уағдаластық.

СИЗМ-ның конгресімен қатар дәл осы Коломбо қаласында бокстан жастар мен жасөсіпірімдер арасындағы Азия біріншілігі өткен болатын. Ұлттық құрама сапында әскери спортшыларда болды. Атап айтсақ 80 келіде Бақберген Әлиасқаров қырғыз қарсыласын ұтып құрлық чемпионы атанды.

Арман Әбеуов, ҚР Қорғанысы министрлігі спорт комитетінің төрағасы:

- Тарихта болмаған нәрсе. Кешегі 12 салмақтан 12 алтын медальды аруларымыз алып жатыр. Бұл үлкен жетістік. Қазақстан, алға!

Осылайша қазақ елі Шри-Ланкадан олжалы қайтты деп айтуға әбден болады. Боксшыларымыз сан мәрте әнұранымызды Коломбо төрінде қалықтатса, Дүниежүзілік әскери спорт ұйымы қазақ күресіне төрден орын берді. Енді әлем елдері тұңғыш рет Астанада өтетін әскерилер арасындағы әлем біріншілігіне қатысады.

Жандос Айтбайұлы